Ѳзбекстан Республикасы Қорғаныӯға кѳмеклесиӯши «Ватанпарвар» шѳлкеми Шымбай оқыӯ-спорт техника клубында районлық халық билимлендириӯ бѳлимине қараслы мектеп оқыӯшылары арасында «Жазғы биатлон» бойынша спорт жарысы болып ѳтти.
Бунда ер балалар 5 км метрге жуӯырыӯ, қызлар 4 км жуӯырыӯ ҳәм 10 метр узақлықтан ҳаӯа мылтығы арқалы белгиленген нышанды анық гѳзлеп атыӯ бойынша ѳз-ара беллести.
Жарыс жуӯмағында ер балалар арасында 1-орынды 43-санлы мектеп оқыӯшысы Илҳам Жаӊабаев, 2-орынды 39-мектеп оқыӯшысы Баӯыржан Пердебаев, 3-орынды 41-санлы мектеп оқыӯшысы Бексултан Жумашовлар ийелеген болса, қызлар арасында 42-санлы мектептен Сановар Мадиярова 1-орынды, 2-орынды Меҳрибан Мамутова ҳәм 3-орынды Гүлжамал Қудайбергеновалар ийелеп, жарыс шѳлкемлестириӯшилери тәрепинен медаль ҳәм дипломлар менен сыйлықланды.
Сондай-ақ, бул жарысқа белсене қатнасқан бир қатар оқыӯшыларда шѳлкемлестириӯшилер тәрепинен хошаметленип, оларға да естелик саӯғалары тапсырылды.
-Оқыӯшылар арасында бундай жарысты ѳткериӯден тийкарғы мақсет- Ѳзбекстан Республикасы Президентиниӊ бес басламасын қоллап-қуӯатлаӯ, жасларды физикалық жақтан ҳәр тәреплеме шынықтырыӯ, спорт тараӯында олардыӊ қәбилетлерин жүзеге шығарыӯ болып табылады. Бизлер усы жаслар арасынан «Жазғы биатлон» бойынша районныӊ сайланды командасына талабанлар таӊлап алдық,-дейди «Ватанпарвар» Шымбай оқыӯ-спорт техника клубы директоры Аяпберген Есемуратов.
Адилбай Оразов,
Қарақалпақстан хабар агентлиги