Өзбекстан Қытайдың короновирусқа қарсы гүресиў ҳәм оны сапластырыў жолында әмелге асырып атырған жумысларын жоқары баҳалайды. Қәўипли апатты жеңиў жолындағы бундай ис-ҳәрекетлерди қоллап-қуўатлаў мақсетинде Өзбекстан Республикасы Президенти Шавкат Мирзиёев усы жыл 11-февраль күни Қытай Халық Республикасына инсаныйлық жәрдемин жибериў ҳаққындағы бийликке қол қойды.
Қытай Өзбекстанның ең жақын шериклеринен бири. Мәмлекетлеримиз арасындағы қатнасықлар стратегиялық шериклик дәрежесине көтерилген. Бул еки мәмлекет басшыларының беккем ерк-ықрары, басламасы себепли болып есапланады.
Алдынырақ Президент Шавкат Мирзиёев ҚХРның Баслығы Си Цзиньпинге мүрәжат жоллап, өзбек халқы Қытайды ҳәр қандай жағдайда қоллап-қуўатлайтуғыны, тилеклес болатуғыны атап өтилген еди. Мәмлекетимиз басшысы сөзлериниң дәлийли сыпатында 12-февраль күни Хубей провинциясына зәрүр өнимлерден ибарат гуманитарлық жәрдем жиберилди.
Хубей провинциясында короновирус анықланған дәслепки күнлерден-ақ Қытай ҳүкимети ҳәм халқы мәмлекет басшысы Си Цзиньпин басшылығында усы кеселликке қарсы гүресиў бойынша қатаң ҳәм мақсетли илажларды көрмекте. Бүгинги күнге келип белгили нәтийжелерге ерисилди. Ҳәзир жағдай шешиўши әҳмийетке ийе екенлигин атап өтиў керек.
– Әне усындай күнлерде Президент Шавкат Мирзиёевтиң басламасы менен Қытай халқына инсаныйлық жәрдеми көрсетилиўи ҳәр биримизди толқынландырады, – дейди ҚХРдың мәмлекетимиздеги Айрықша ҳәм толық-хуқықлы елшиси Цзян Янь ханым. – Қытайлыларда мынадай сөз бар: «Дослар бир-бирине аўыр күнде жәрдем бериўи керек». Бул өзбек халқының «Дос қыйналғанда билинеди» деген мақалы менен бирдей. Биз Өзбекстан ҳүкимети ҳәм халқы тәрепинен көрсетилип атырған бийминнет жәрдемин терең сезип атырмыз. Бундай жақсы мүнәсибетти Қытай жоқары қәдирлейди. Бул тек ғана жүк емес екенлигин биз жақсы аңлаймыз. Шын елине керекли өнимлер менен бирге терең тилеклеслик сезими жиберилмекте.
Гуманитарлық жүк қурамында ең зәрүр өнимлер – стерилленген бир мәртелик қолқаплар, қорғаўшы комбинезонлар, бет ушын фильтрлеў нықаплары ҳәм басқа да өнимлер бар.
– Өзбекстан ҳәм Қытай әзелий дос, – дейди Өзбекстан Республикасы сыртқы ислер министриниң орынбасары Дилшод Аҳматов. – Мәмлекетлеримиз арасындағы стратегиялық шериклик қатнасықлары избе-из раўажланбақта. Өзбекстаннан Қытайға жиберилген инсаныйлық жүги де еки тәреплеме бирге ислесиўдиң бүгинги жоқары дәрежесин көрсетеди.
Коронавирус пенен байланыслы жағдайды инабатқа алып, Президентимиздиң тийисли бийлиги қабыл етилди. Бийликке муўапық, қәўипли кеселлик Өзбекстанға кирип келиўиниң алдын алыў бойынша барлық илажлар көриў зәрүрлиги белгиленген. Атап айтқанда, мәмлекетимизде санитария-карантин пунктлери шөлкемлестирилип, шыпакерлер, яғный инфекционист ҳәм эпидемиологлар, медицина хызметкерлериниң нәўбетшилиги енгизилген. ҚХРдан алып келинип атырған ўатанласларымыз санитария-карантин пунктлеринен өтип, қатаң медициналық қадағалаўға алынбақта.
– Ҳәзирге шекем Ухань ҳәм Пекин қалаларынан 584 Өзбекстан пуқарасы алып келинди, – дейди денсаўлықты сақлаў министриниң биринши орынбасары Баҳодир Юсупалиев. – Олар 14 күнге айрықша ажыратылған медициналық мәкемелерге жайластырылған. Себеби, коронавирус кеселлигинде 14 күн инкубациялық дәўир есапланады. Пуқаралар усы ўақыт ишинде турақлы бақлаўда болады. Бул мәкемелерде барлық зәрүр шараят жаратылған. Дәри-дәрмақ резервлери жетерли, шыпакерлер қадағалаўы орнатылған.
Ҳәзирги ўақытта Айрықша жағдайлар министрлиги тәрепинен тийисли министрлик ҳәм уйымлар менен биргеликте инсаныйлық жәрдеминиң екинши басқышын қәлиплестириў басланған.
Ғ.ХОННАЗАРОВ,
ӨзАның хабаршысы