И.В. Савицкий атындағы Қарақалпақ мәмлекетлик көркем өнер музейинде «Ўатан сүйиўшилик-миллий раўажланыў гиреўи» атамасында илаж болып өтти.
Өзбекстан Республикасы Миллий гвардиясы Қарақалпақстан Республикасы бойынша басқармасы ҳәм Қорғау басқармасы менен биргеликте шөлкемлестирилген илаждың мақсети, музейдиң археология қорында сақланып атырған әййемги дәўирлерге тийисли қурал-жарақлардың үлгилерин, соның менен бирге Миллий гвардия ҳәм Қорғау басқармасы хызметкерлери тәрепинен бүгинги күни пайдаланып киятырған оқыў жаўынгерлик қураллар, заманагөй сигнализация үскенелери менен келип көриўшилерди, соның ишинде жасларды таныстырыўдан ибарат. Соның менен бирге, олардың тарийхы, раўажланыўы, қолланылыўы туўралы мағлыўмат бериў, әскерий хызметкерлердиң турмысы менен жақыннан таныстырыў, сол арқалы олардың Ўатан сүйиўшилик сезимлерин арттырыў, халық пенен армияның бирлигин буннан былай да беккемлеў болып табылады.
Музей қорында сақланып атырған әййемги дәўирлерге тийисли табылмалар Қубла Арал бойларында жасаған жергиликли халықтың мәденияты, жасаў шараяты, динге исеними, сондай-ақ, душпанлардан қорғаныўда пайдаланған қурал-жарақлары ҳаққында кең түрде түсиник береди.
Қарақалпақстан Республикасы аймағында әййемги дәўирлерден берли сақланып киятырған ески қалалар, мәкан жайлары, кәрўан сарайлар, қорғанлардың излери бүгинги күнге келип өзиниң әҳмийетин жойытпаған. Көргизбеден Топырақ қала, Адамлы қала сыяқлы антик естеликлер қатарында Үлкен Гүлдирсин, Жампық қала, Қабат қалалардан табылған орта әсирлерге тийисли 34 экспонат көргизбеге қойылды. Олардың арасында узақ аралықтан саўаш алып барыўда оғада әҳмийетли қураллардан бири болған оқ жайдың бөлеклери, темир ҳәм қоладан исленген оқ ушлары және писен бөлеги, түрли өлшемдеги ядролар, найза ушлары, сондай-ақ, жақын аралықтан саўаш алып барыўда пайдаланған балталар, пышақлар ҳәм басқа да қурал-жарақлар орын алған. Келип көриўшилер олардың тарийхы, таярланыўы ҳәм қолланылыўы бойынша қызықлы мағлыўматлар алды.
Көргизбеде Миллий гвардия ҳәм Қорғау басқармасы хызметкерлери тәрепинен бүгинги күни пайдаланып киятырған оқыў жаўынгерлик қураллары, заманагөй сигнализация үскенелери бойынша да мағлыўматлар берилди.
Қарақалпақстан хабар агентлиги.