Нөкис қалалық мәденият бөлимине қараслы «Ақ жағыс» мәденият орайы имаратынан пайдаланыўдың имканияты жоқ. Орай өз жумысларын 2-санлы улыўма билим бериў мектебиниң имаратында даўам еттирмекте, деп хабар берген Қарақалпақстан Республикасы Мәденият министрлиги Kun.uz сайтына.
Буннан алдың сайтта авариялық жағдайдағы мәденият орайы ҳаққында мақала жәрияланған еди. Мәденият орайының сүўретлерине қарап, имарат бир қарағанда қоймахана ямаса қарамаллар сақланатуғын орынға уқсайды.
«Балалардың дөгерек сабақларына ықласы жоқары, бирақ олар ушын бул жерде я имканият, я болмаса мүнәсип шараят жоқ. Муғаллим ҳәм балалар бир тәрептен дийўалдың қулап түсиўинен қорқып отырса, екинши тәрептен сынық есиклер ҳәм айналардан кирип атырған суўықтан тоңады», – деп жазады Өмирбай Есбергенов қулап түсиўге жақын турған орайда билим алыўды қәлейтуғын 60 тан аслам балалар ҳаққында.
Мақалада орай басшылары бул жағдай бойынша «тийисли жоқары шөлкемлердиң ҳәммесиниң хабары бар» деген мазмундағы пикирлерди келтирип өткени айтылған еди.
Қарақалпақстан Республикасы Мәденият министрлигиниң мағлыўматларына қарағанда, имарат 1971-жылы «поликлиника» сыпатында қурылған болып, жәми 2025 м/кв жер майданға ийе болған.
«Өзбекстан Республикасы Министрлер Кабинетиниң 2013-жыл 25-июньдағы 178-санлы қарарына тийкарланып бул орай 2018-жылы реконструкцияланыўы нәзерде тутылған еди. Бирақ, жергиликли бюджет қаржылары ажыратылмағаны себепли бул объекте реконструкция ҳәм үскенелеў жумыслары алып барылмаған», – деп жазылған министрлик хабарында.
Министрлер Кабинетиниң тийисли ҳүжжетинде болса мәденият орайларын реконструкциялаў ушын бюджет қаржыларынан тыяқары, бос турған қаржылар, сондай-ақ, қәўендерлик қаржылары есабынан орынлаўға рухсат берилген.
Жуўапкерлер мәденият ҳәм халықтың дем алыў орайлары имаратларын жақсы оңлаў, сондай-ақ, зәрүрлик болғанда, реконструкциялаў ҳәм оларды заманагөй әсбап-үскенелер және инвентарлар менен үскенелеў ушын келеси жылға тастыйықланыўы нәзерде тутылған аймақлық мәнзилли дизимлерди ҳәр жылы белгиленген тәртипте ҳәм мүддетлерде Өзбекстан Республикасы Экономика министрлигине ҳәм Қаржы министрлигине киргизиўи де мүмкин еди. Тилекке қарсы, бундай ҳәрекетлер де алып барылмаған, деп жазылған Kun.uz хабарында.
Қарақалпақстан хабар агентлиги