Әжинияз атындағы Нөкис мәмлекетлик педагогикалық институты дүнья жүзиндеги ең абыройлы 50 ге жақын жоқары оқыў орынлары менен еки тәреплеме байланыслар орнатты.
Институт халықаралық байланыслар бөлими баслығы Қумар Бегниязованың бизге билдириўинше, бул жоқары оқыў орынлары Англия, Польша, Россия, Қытай ҳәм Қазақстан сыяқлы мәмлекетлердиң педагогика бағдарындағы жоқары оқыў орынларынан ибарат.
Усы жылдың өткен 6 айы даўамында институттың 70 ке шамалас профессор-оқытыўшылары халықаралық конференциялар, семинар ҳәм басқа да илимий-педагогикалық сапарларда болып, қатнасып қайтты.
Институт Эразмус + Рукфельт, Эразмус + Магнет ҳәм Аксесс сыяқлы 3 халықаралық жойбарда белсене қатнаспақта.
Сондай-ақ, институт ҳәзирги ўақытта Британия ҳәм Жәҳән банкиниң, сондай-ақ, Халықаралық раўажландырыў фондының грантлар бағдарламасында да мүнәсип түрде қатнаспақта.
Бундай халықаралық байланыслардың раўажланыўы әлбетте өз нәтийжесин береди.
Ислам Матеков,
Қарақалпақстан хабар агентлигиниң шолыўшысы.