Өзбекстан Республикасы Президенти Шавкат Мирзиёев 11-июнь күни Әзербайжан мәденияты күнлерин өткериў шеңберинде мәмлекетимизде болып турған Әзербайжан Республикасы мәденият министри Адил Каримлини қабыл етти.
Ушырасыў алдында Адил Каримли мәмлекетимиз басшысына Әзербайжан Президенти Илҳам Алиевтиң сәлемлери ҳәм ең жақсы тилеклерин жеткерди.
Өзбекстан менен Әзербайжан арасындағы стратегиялық шериклик қатнасықларын, атап айтқанда, әҳмийетли есапланған гуманитар тараўдағы байланысларды және де кеңейтиў мәселелери көрип шығылды.
Мәмлекетимиз жетекшиси соңғы жыллары мәдений алмасыў жеделлескенин үлкен қанаатланыўшылық пенен атап өтти.
Усы жылдың басынан берли Баку қаласында Өзбекстан илими ҳәм мәденияты күнлери, көргизбе ҳәм «Лазги» миллий балети премьерасы табыслы өткерилди.
Әзербайжан мәденияты күнлери шеңберинде шайыр ҳәм ойшыл Муҳаммед Фузулий китабының презентациясы болып өтти. Сондай-ақ, көргизбе, сахна шығармалары үлгилери ҳәм басқа илажлар өткерилиўи режелестирилген.
«Жол картасы» тийкарында жедел қарым-қатнасты ҳәм илажларға бай мәдений бағдарламаны даўам еттириў, ЮНЕСКО, ТҮРКСАЙ ҳәм АЙСЕСКО сыяқлы халықаралық шөлкемлер шеңберинде биргеликтеги баслама ҳәм жойбарларды алға қойыў зәрүрлиги атап өтилди.
ӨзА