Нөкис қаласындағы Әбиў Әлий Ибн Сино атындағы жәмийетлик саламтлық техникумында «11-ноябрь-Кәсиплик аўқамлар күни» байрамына бағышланып, медицина хызметкерлери арасында Өзбекстан Денсаўлықты сақлаў хызметкерлери кәсиплик аўқамының Қарақалпақстан Республикалық Кеңеси кубоги ушын мини футбол бойынша жарыс өткерилди.
Жарыста республикамыздағы мәкеме-шөлкемлерден 14 команда қатнасты.
Жуўмақлаў басқышында, Қарақалпақстан Республикасы Денсаўлықты сақлаў министрлиги командасы биринши орынды жеңип алған болса, Республикалық қан қуйыў станциясы командасы екинши ҳәм Республикалық қәнигелестирилген наркология илимий-әмелий медицина орайы Қарақалпақстан филиалы командасы сыйлы 3-орынды ийелеўге еристи.
Жарыс жуўмағында, қатнасыўшылар шөлкемлестириўшилер тәрепинен кубок, медаллар, диплом ҳәм де баҳалы саўғалар менен сыйлықланды.
Адилбай Оразов,
Қарақалпақстан хабар агентлиги шолыўшысы