Нөкис қаласындағы 1-санлы спорт мектебинде грек-рим, еркин гүрес ҳәм ҳаял-қызлар гүреси бойынша “New Uzbekistan” халықаралық жарыс жуўмақланды.
Президентимиздиӊ 2022-жыл 29-июльдеги “Спорт гүреслериниӊ олимпия түрлерин буннан былай да раўажландырыў илажлары ҳаққында”ғы қарарының орынланыўын тәмийинлеў мақсетинде үш күн даўамында өткерилген жарыста Тәжикстан, Қырғызстан, Қазақстан, Беларусь, Түркменстан, Армениядан ҳәм елимиздиӊ барлық аймақларынан 300 ден зыят палўан қатнасты.
Грек-рим гүреси бойынша өз салмақ категориясында мәмлекетимиз спортшылары А.Халимбоев, Т.Туйев, М.Бахшиллоев, А.Абдумуталибов, С.Рустамов, ең аўыр салмақ категориясында Беларусь Республикасынан Д.Зарубский, еркин гүрес бойынша М.Шавкатов, С.Даминжанов, Ш.Поёнов, Н.Абдурашидов, Қырғыз Республикасынан Билол Шариб улы, Қазақстаннан А.Қурманелиев биринши орынларды ийеледи.
Ҳаял-қызлар гүреси бойынша 50 килограмм салмақ категориясында Тәжикстаннан В.Шакаршоева жеңимпаз болған болса, қалған 5 салмақ категориясында қарақалпақстанлы қызлар биринши орынларды ийеледи. Атап айтқанда өз салмақ категорияларында С.Жиенбаева, А.Қурбанбаева, М.Қошмуратова, Н.Есенбаева ҳәм В.Төрениязова жеңимпазлықты қолға киргизди.
Халық аралық жарыс жеңимпазлары шөлкемлестириўшилер тәрепинен диплом, медаль ҳәм естелик саўғалары менен сыйлықланды.
Қарақалпақстан хабар агентлиги