Бүгинги күни Бердақ атындағы Қарақалпақ мәилекетлик университети мәмлекетимиздеги ҳәм оныӊ тысқарысындағы жоқары билимлендириў, илимий-изертлеў мәкемелери қатарында раўажланған сырт еллердиӊ абырайлы компаниялары менен бирге ислесиўши жоқары оқыў орынларыныӊ бири есапланады.
Буныӊ айқын дәлили сыпатында оқыў орны менен Қубла Кореяныӊ “Younginsn SO LTD” компаниясы арасында өз-ара бирге ислесиў бойынша меморандум дүзилгенлигин атап өтиў мүмкин. Усы тийкарда және илимий-инновациялық бирге ислесиў бағдарында бирге ислесиўди буннан былай да беккемлеў мақсетинде университет ректоры А.Реймовтыӊ компания Президенти Чой Сек Хоан менен гезектеги ушырасыўы болды.
Илаж даўамында оқыў орны ҳәм компания арасындағы билимлендириў, илим ҳәм өндирис интеграциясына бағдарланған бир қатар келисимлерге ерисилди. Атап айтқанда, университетте алдағы ўақытлары азық-аўқат қәўипсизлигин тәмийинлеў бойынша өз алдына лаборатория әсбап-үскенелерин ҳәм басқа да қурылмаларды орнатыў, компания ўәкиллериниӊ тиккелей бул жерде илимий-әмелий изертлеўлер алып барыўы режелестирилмекте.
Ушырасыў барысында бул бойынша бирге ислесиў шәртнамасы дүзилип, алдағы режелер тийкарында ўазыйпалар белгиленди.
Қарақалпақстан хабар агентлиги