Әмелдеги нызамшылықта белгиленген психотроп дәрилердиӊ бажыхана шегералары арқалы алып өтиў талапларына бойсынбағанлар жуўапкершиликке тартылады.
Шегараларымыздағы қырағы бажыханашылар тәрепинен инсанныӊ санасын зәҳәрлеп, оныӊ денсаўлығына кери тәсир ететуғын бундай дәрилердиӊ мәмлекетимиздиӊ аймағына кириў жағдайларына шек қойылмақта.
Атап айтқанда, Қарақалпақстан Республикасы бажыхана басқармасы “Даўыт ата” шегара бажыхана посты арқалы Қазақстан Республикасынан “Ford tranzit” маркалы автотранспорт қуралында кирип келген пуқара С.Ш емлеў мәкемелериниӊ тийисли рухсатнамасына ийе болмаған, жолаўшы бажыхана декларациясында жазып көрсетилмеген, ҳәр бири 25 мг.нан болған 100 дана жәми 2500 мг. “Баклосан” атамасындағы психотроп дәрилерин жасырын тәризде алып киятырғаны мәлим болды.
Және бир усындай жағдайда “Даўыт ата” шегара бажыхана постына кирип келген “Lada Largus” маркалы автомашина бажыхана тексериўинен өткерилгенди, бажыхана хызметкериниӊ аўыз-еки сораўында айтылмаған ҳәм жолаўшы бажыхана декларациясында жазып көрсетилмеген, ҳәр бири 10 мг.нан болған 50 дана “Баклосан” психотроп дәрилерин жасырын тәризде мәмлекетимизге алып кирмекши болғанлар анықланды.
Бул жағдайлар бойынша бажыхана уйымлары тәрепинен тергеўге шекемги тексериў ҳәрекетлери алып барылмақта.
Қарақалпақстан хабар агентлиги