Наўайы мәмлекетлик кәншилик ҳәм технологиялар университети Нөкис кәншилик институтында «Ҳақ жол, сизге питкериўши!» атамасында жоқары оқыў орнының дәслепки питкериўшилерине диплом тапсырыў мәресими болып өтти.
Быйылғы жылы институтты «Кәншилик иси» ҳәм «Химиялық технология» тәлим бағдарлары бойынша 53 студент питкерди. Бүгинги күнде усы питкериўшилердиң 10 ы жумыс пенен тәмийинленген.
Илажда студент-жаслар, ата-аналар, өндирис кәрханалары ҳәм жәмийетшилик ўәкиллери қатнасты. Институт директоры, профессор А.Қайыпбергенов жаслардың ҳәр тәреплеме терең билим алыўы ушын барлық шараятлар жаратылып атырғанын атап өтти.
Жоқары билимлендириў, илим ҳәм инновациялар министрлигиниң Қарақалпақстан Республикасы аймақлық басқармасының баслығы Н.Каюпов келешекте «Эл-юрт умиди» фонды арқалы абырайлы сырт ел жоқары оқыў орынларының магистратура ҳәм докторантурасында оқыўға жиберилетуғын жаслардың қатары кеңейип атырғанын, жоқары оқыў орынларында мәмлекетлик грантлардың кеминде 25 процентке артқанлығын, қарақалпақстанлы жаслар ушын мәмлекетлик грант тийкарында оқыў ушын қосымша 3 мың орын ажыратылғанын ҳәм басқа да жоқары билимлендириў тараўындағы имканиятларды атап өтти.
– Институтты тамамлап, бакалавр дәрежесине ерискенимнен қуўанышлыман, -дейди институт питкериўшиси А.Ембергенов. – Оқыў даўамында бир қанша жетискенликлерге еристим, халықаралық жойбарлар ҳәм грантларда қатнасып, өз билим ҳәм көнликпелеримди арттырдым. И.Юсупов атындағы мәмлекетлик стипендия ийеси болдым. Best Publication илимий изертлеўлер орайының ҒМДА мәмлекетлери көлеминде шөлкемлестирген «Илим тараўындағы хызметлери ушын» естелик белгиси менен сыйлықландым. Мениң усы дәрежеге жетисиўимде, бир қатар жетискенликлерге ерисиўимде устазларымның хызмети үлкен.
Қарақалпақстан хабар агентлиги