Өзбекстан Республикасы Экология, қоршаған орталықты қорғаў ҳәм климат өзгериўи министрлиги жанындағы Аралбойы халықаралық инновация орайы менен Қытай Илимлер Академиясына қараслы Синьцзян экология ҳәм география институты илимпазлары арасында өткерилген сөйлесиўлер нәтийжесинде республикамыз аймағында цистанхе өсимлигин тәжирийбе тийкарында жетистириў бойынша келисимге ерисилди.
Усы мақсетте институт илимпазлары менен қәнигелеринен ибарат илимий делегация республикамызға келди. Аралбойы халықаралық инновация орайының директоры Б.Хабибуллаевтың мийманлар менен болған ушырасыўында цистанхе дәрилик өсимлигин жетистириў бойынша таярлық жумыслары додаланды.
Сондай-ақ мийманлар Шымбай районында болып, өсимлик егилетуғын жерлерди үйренди. Район ҳәкимлигиндеги ушырасыўда биргеликте әмелге асырылатуғын жумыслардың кейинги басқышы додаланды.
Илимий делегация ағзалары сапарының екинши күни Арал теңизиниң қурыған түбине экспедиция шөлкемлестирилди. Қатнасыўшылар бул жерде жаратылған тоғай плантацияларында цистанхе дәрилик өсимлигин жетистириў ушын қолайлы орынларды үйренди.
Қарақалпақстан хабар агентлиги