Бүгин Қарақалпақстан Республикасы балалар китапханасында «Соңғы қоңыраў» кешесине бағышланып, «Илимди қәдирлең, илимге умтылың» сүрени астында байрам кешеси болып өтти.
Оған Нөкис қаласында жайласқан мектеп оқыўшылары ҳәм пайтахтымыздағы 32-санлы улыўма орта билим бериў мектебин буннан 20 жыл бурын питкерип шыққан питкериўшилер қатнасты.
Илаж даўамында жаңа әдебиятлар көргизбеси шөлкемлестирилип, қатнасыўшылар ондағы китаплар менен жақыннан танысты. Сондай-ақ, оқыўшылар арасында китапқумарлық бойынша викториналық ҳәм интерактив ойынлар, концерт бағдарламалары шөлкемлестирилип, бул қатнасыўшыларда өзгеше тәсир қалдырды.
-Илажды өткериўден тийкарғы мақсет, мектеп оқыўшыларының китапқа болған қызығыўшылығын арттырыў ҳәм олардың ийелеген билимлерин беккемлеўден ибарат,-дейди Қарақлпақстан Республикасы балалар китапханасының бөлим баслығы Кеўлимжай Ибрайымов.
Адилбай Оразов,
Қарақалпақстан хабар агентлиги шолыўшысы