Сырдәрья ўәлаяты Гүлистан қаласында өткерилип атырған III халықаралық бақсышылық көркем өнери фестивалының халықаралық таңлаўы жеңимпазлары бүгин анықланады.
Сырдәрья ўәлаяты музыкалы драма театрында болып өткен халықаралық таңлаўда Түркия, Армения, Япония, Словения, Греция, Корея, Қырғызстан, Қазақстан сыяқлы жәми 32 мәмлекеттен 64 қатнасыўшы өз талантын сынақтан өткерди. Бул таңлаўға Өзбекстан Республикасынан 10 бақсы, соның ишинде республикамыздан Өзбекстан халық бақсысы, сазенде Ғайратдин Өтемуратов, “Ниҳол” мәмлекетлик сыйлығының лауреаты, жыраў Саламат Аяпов ҳәм “Жаңа Өзбекстан жулдызлары” миллий сыйлығының ийеси, бақсы қыз Улдәўлет Сәрсенбаевалар қатнасты.
Халықаралық таңлаўда қарақалпақстанлы жыраў, “Ниҳол” мәмлекетлик сыйлығының ийеси Саламат Аяпов “Едиге” дәстанынан үзинди, Өзбекстан халық бақсысы Ғайратдин Өтемуратов қарақалпақ халық сазы “Қара дәли” ҳәм өзиниң авторлығындағы “Кеўил наласы” сазын, “Жаңа Өзбекстан жулдызлары” миллий сыйлығының ийеси Улдәўлет Сәрсенбаева “Дәўлетиярбек” дәстанынан үзинди атқарды.
Гүлистан қаласындағы орайлық амфитеатрда концерт бағдарламасы болып өтти. Онда Өзбекстан мәмлекетлик филармониясы Қарақалпақстан Республикасы бөлиминиң “Мухаллес” дуўтаршылар ансамбли фестиваль қатнасыўшылары ҳәм мийманларға қарақалпақ миллий қосықларынан ибарат концерт бағдарламасын усынды.
III халықаралық бақсышылық көркем өнери фестивалы шеңберинде “Заманагөй бақсышылық көркем өнери: алтын мийрастың жаңа ҳаўаз сазалары” атамасындағы халықаралық илимий-әмелий конференцияда болып өтти. Усы конференцияда Нөкис қалалық 22-санлы балалар музыка ҳәм көркем өнер мектебиниң муғаллими, Қарақалпақстан Республикасына мийнети сиңген мәденият хызметкери Жолдасбай Турдымуратов “Әмет бақсы қарақалпақ дәстаншылық көркем өнериниң тулғасы” атлы баянаты менен табыслы қатнасып, шөлкемлестириўшилер тәрепинен сыйлықланды.
III халықаралық бақсышылық көркем өнери фестивалының халықаралық таңлаўы жеңимпазлары бүгин анықланады.
Гүлмийра ПАЛЎАНОВА,
Сырдәрья ўәлаяты , Гүлистан қаласы.
Қарақалпақстан хабар агентлиги