Жоқары оқыў орынларында студент-жаслар менен ислесиўдиң нәтийжелилигин арттырыў ҳәм олардың бос ўақытларын мазмунлы шөлкемлестириўге қаратылған илажлардың орынланыўын тәмийинлеў мақсетинде жоқары оқыў орынларында «Карьера күни» мийнет ярмаркалары шөлкемлестирилмекте.
Усындай ярмаркалардан бири Өзбекстан мәмлекетлик денетәрбиясы ҳәм спорт университети Нөкис филиалында болып өтти. Нөкис қаласындағы 46 мәкеме-кәрхана ҳәм шөлкемниң ҳәр бир ажыратылған ўәкили өзлериниң 80 нен аслам бос жумыс орынлары менен таныстырып, кең түрде мағлыўмат берди. Илаж даўамында 7 студент жумысқа орналасыў бойынша шәртнама дүзген болса, 15 студентке қәнигелер тәрепинен ҳуқықый мәсләҳәтлер берилди. Мийнет ярмаркасын өткериўден мақсет – жумыс бериўшилер менен тиккелей сәўбетлесиў арқалы оқып атырған студент-жасларға жумыс табыў, кадрларға зәрүрлиги бар кәрханаларға жумысқа жайласыў имканиятлары ҳақында аймақлық мийнет базары бойынша толық мағлыўматқа ийе болыў. Жумыс бериўшилерге зәрүрли кадрларды таңлаўда әмелий жәрдем көрсетиў. Филиалдың питкериўши курс студентлерин жумыс пенен тәмийинлеў, олардың жумыс орны мәселесинде таңлаў имканиятын арттырыў.
-Бүгинги күнде филиалымызда 20 қәнигелик бойынша 1мың 225 студент билим алады. Олардан 500 ге шамаласы питкериўши болып есапланады. Болып өткен мийнет ярмаркасында питкериўши студентлер, өз тараўы бойынша жумыс излеп жүрген жаслар қатнасты. Бүгинги ярмаркада да студент-жаслар өзлерине мақул болған жумыс орынларына ийе болды, -дейди филиалдың баспасөз хызмети баслығы Мурат Тилеўбаев.
Қарақалпақстан хабар агентлиги