Жақында Нөкис олимпия ҳәм паралимпия спорт түрлерине таярлаў орайында ер адамлар ҳәм ҳаял-қызлар арасында спорттың Пара жеңил атлетика түри бойынша Қарақалпақстан Республикасы чемпионаты болып өтти.
Илаж Қарақалпақстан Республикасы Жаслар сиясаты ҳәм спорт министрлиги ҳәм Өзбекстан Паралимпия комитети Қарақалпақстан бөлими тәрепинен усы жылдың 26-30-апрель күнлери Ташкент қаласында болып өтетуғын Өзбекстан чемпионатына спортшыларды таңлап алыў мақсетинде өткерилди.
Беллесиўде Төрткүл, Беруний, Хожели, Шоманай районлары ҳәм Нөкис қаласындағы спорт мектеплеринен 50 пара атлет өз күшин сынақтан өткерди.
Илажды Өзбекстан жеңил атлетика федерациясы Қарақалпақстан бөлиминиң атқарыўшы директоры Толыбек Арзыбеков кирис сөз бенен ашып, спортшыларға әўмет тилеп, усы беллесиўдиң шөлкемлестириўшилерине өз миннетдаршылығын билдирди.
Соң беллесиўлерге старт берилди. Спортшылардың көрсеткен нәтийжелери төрешилер тәрепинен әдил баҳаланып барылды. Т-12 класында 100 ҳәм 200 метрге жуўырыў бойынша Ш.Базарбаев, Т-37 класында 200 метрге жуўырыў бойынша К.Искендеров, 100 метрде Р.Айтбаев, Т-46-47 класында 400 метрге жуўырыў бойынша С.Разумовлар жоқары нәтийже көрсетти. F-33 класында ядро ылақтырыў бойынша Н.Жаббарбергенов ҳәм және F-40, 46-47, 56-57 класлары бойынша да жеңимпазлар анықланды. К.Искендеров F-37 класында диск ҳәм ядро ылақтырыў бойынша да күшли екенлигин дәлийлледи. Усы класта найза ылақтырыў бойынша Р.Айтбаев, ал, F-46-47 класында Х.Ерниязов биринши орынға ылайық деп табылды. F-56-57 классы бойынша найза ҳәм ядро ылақтырыўда бириншилик А.Жаббарбергеновқа несип етти.
Ал, ҳаял-қызлар арасында Т-12 класында 100 метрге жуўырыў бойынша Г.Жолдасбаева, 200 метрге жуўырыў бойынша Р.Генжебекова, Т-37 класында 100 ҳәм 200 метрге жуўырыў, найза ҳәм ядро ылақтырыў бойынша А.Қарлыбаева бириншиликке мүнәсип деп табылды. Ядро ылақтырыў бойынша Т-33, F-40-41, F-46-47, F-56-57 класларында Г.Султабаева, Н.Нурымбетова, Б.Ермағанбетова, Б.Қалбаевалар жеңип шықты. Н.Нурымбетова өзиниң класы бойынша диск ылақтырыў бойынша де теңсиз екенлигин дәлилледи. Найза ылақтырыў бойынша ТF-46-47 класында М.Есеналиева, ТF-56-57 классы бойынша Б.Қалбаева бириншиликти қолға киргизди.
Жеңимпазларға шөлкемлестириўшилердиң ҳүрмет жарлығы тапсырылды.
Қарақалпақстан хабар агентлиги