Нөкис Әбиў Әлий Ибн Сино атындағы жәмийетлик саламатлық техникумының спорт базасында 8-март –Халық аралық ҳаял-қызлар байрамы күни мүнәсибети менен жоқары ҳәм орта арнаўлы билимлендириў оқыў орынларында жумыс ислеп атырған ҳаял-қызлар арасында спорттың армрестлинг, дартс, шашка, волейбол түрлери бойынша Ҳаял-қызлар спартакиадасы өткерилди.
Жарысқа оқыў орынларынан 7 команда қурамында 70 тен аслам ислеўши ҳаял-қыз қатнасты. Жарыс жуўмағында улыўма командалық есапта Қарақалпақстан медицина институты биринши, Нөкис медицина колледжи екинши, Нөкис Әбиў Әлий Ибн Сино атындағы жәмийетлик саламатлық техникумы үшинши орынларды ийеледи.
Соның менен бирге “Ең жасы үлкен қатнасыўшы”, “Ең шебер ҳәўескер қатнасыўшы”, “Жеңиске болған умтылыўшылығы ушын”, “Ең жасы киши қатнасыўшы” номинациялары бойынша да жеңимпазлар анықланды.
Спартакиада жуўмағында жеңимпазлар Өзбекстан денсаўлықты сақлаў хызметкерлери кәсиплик аўқамы Қарақалпақстан Республикасы Кеңесиниң тийисли дәрежедеги дипломлары, медальлары, кубоклары ҳәм баҳалы саўғалары, номинациялар жеңимпазлары да дипломлар, баҳалы саўғалар менен сыйлықланды. Жарысты шөлкемлестириўде жақыннан жәрдем берген мәкемелерге де баҳалы саўғалар тапсырылды.
Д.АБИБУЛЛАЕВ,
Қарақалпақстан хабар агентлигиниң шолыўшысы