Усы жылдың 20-май күни Индонезияда 20 жасқа шекемги футболшылар арасында 21-жәҳән чемпионатына старт бериледи.
Бүгинги күнге келип 11-июньге шекем даўам ететуғын бул жәҳән чемпионатына қатнасыўшы сайланды командалардың атлары толық мәлим болды. Олар арасында Ташкент қаласында өткерилип атырған Азия чемпионатында ярым финалға жол алған Өзбекстан сайланды командасы да бар.
Сондай-ақ, чемпионатта майдан ийелери ҳәм Өзбекстаннан тысқары, Уругвай, АҚШ, Франция, Сенегал, Италия , Қубла Корея, Англия, Жаңа Зеландия, Бразилия, Колумбия, Эквадор, Нигерия, Япония, Ирак, Гондурас, Фижи, Гватемала, Доминикан Республикаси, Гамбия, Израил, Словакия ҳәм Тунис сайланды командалары да қатнасады. .
Мағлыўмат ушын айтып өтиўимиз керек, жаслар арасындағы жәҳән чемпионатының әмелдеги жеңимпазы Украина болып есапланады. Ал, ең көп чемпионлық титулын болса, Аргентина сайланды командасы 6 мәрте қолға киргизген (1979, 1995, 1997, 2001, 2005, 2007).
Өзбекстанлы жаслар ушын болса, бул чемпионат бесинши мундиал болып есапланады. Буннан алдын жас футболшыларымыз жәҳән чемпионатында төрт мәрте қатнасып, еки мәрте шерек финалға шығыўға миясар болған.
Адилбай Оразов,
Қарақалпақстан хабар агентлиги шолыўшысы