Қарақалпақстан Республикасы Мәлимлеме технологиялары техникумында жасларды спорт шынығыўларына таярлаў, олардың қәўипсизлигине байланыслы билимлерин теориялық ҳәм әмелий жақтан беккемлеў, қутқарыўшылық кәсибине қызығыўшылықларын арттырыў мақсетинде көргизбели семинар шөлкемлестирилди.
Оған Нөкис қалалық Айрықша жағдайлар басқармасының қәнигелери, оқыў орны директорының орынбасарлары, жетекшилер, оқыўшы-жаслар қатнасты.
Семинарда оқыўшылар «Жас қутқарыўшы» волонтёрлар клубын шөлкемлестириўге байланыслы мағлыўматлар менен танысып, тараў ўәкиллери тәрепинен оның уставы, келешекте өткерилетуғын жарыслардың қағыйдалары, баҳалаў критериялары ҳаққында жасларға кең түрде түсиник берилди.
-«Жас қутқарыўшы» волонтёрлар клубын шөлкемлестириў ушын бүгин жасларды жәмледик, -дейди Нөкис қалалық Айрықша жағдайлар басқармасы баслығының орынбасары, майор Қ.Әметов. – Буннан мақсет саламат турмыс тәризине әмел ететуғын, дәслепки таярлыққа ийе, ўатансүйиўши, жуўапкершиликли, қыйын ҳәм экстремал жағдайларда дурыс ҳәрекет етиў көнликпелерин ийелеген бәркамал әўладты тәрбиялаў.
Семинардан соң қатнасыўшылар айрықша жағдайларда пайдаланылатуғын арнаўлы әсбап-үскенелерден ибарат көргизбени тамашалады. Айрықша жағдайлар басқармасы қәнигелери олардан пайдаланыў бойынша түсиник берип өтти.
Оқыўшы-жаслар өзлерин қызықтырған сораўларына жуўап алды.
Қарақалпақстан хабар агентлиги