Быйыл февраль айы Өзбекстан Республикасы Ишки ислер министрлигиниң басламасы менен «Жаслар арасында нәшебентлик ҳәм психотроп затлардың тарқалыўына қарсы гүресиў» айлығы деп жәрияланды. Айлық шеңберинде пайтахтымыздағы жоқары оқыў орынларының студент-жаслары, улыўма орта билим бериў мектеплери оқыўшыларының қатнасыўында дөгерек сәўбетлери, ушырасыў ҳәм таңлаўлар болып өтпекте.
Нөкис қалалық 50-санлы улыўма орта билим бериў мектебинде Қарақалпақстан Республикасы Транспортта қәўипсизликти тәмийинлеў басқармасы «Нөкис» станциясы бөлими хызметкерлери тәрепинен шөлкемлестирилген илажда оқыўшы-жасларға усы тема шеңберинде кең түрде мағлыўматлар берилди. Оқыўшылар тәрепинен нәшебентлик иллетиниң аянышлы ақыбетлери сәўлеленген сахналық көринислер қойып берилди.
– Елимизде жаслардың оқыўы, кәсип-өнер ийелеўи, өзиниң қәбилетин жүзеге шығарыўы, бос ўақтын мазмунлы өткериўи ушын кең имканиятлар жаратып берилиўине қарамастан, олардың арасында ҳәр қыйлы иллетлер, әсиресе, нәшебентлик тәсирине түсип қалатуғын жаслардың ушырасып атырғаны аянышлы, -дейди басқарманың Нөкис аэропортында қәўипсизликти тәмийинлеў басқармасы Ҳуқықбузарлықлар профилактикасы топарының үлкен инспекторы, аға лейтенант Н.Мамбеткаримов. – Оларды усындай жаман иллетлерден сақлаў бағдарында ҳуқық қорғаў уйымлары, кең жәмийетшилик пенен биргеликте алып барылып атырған бүгингидей үгит-нәсият илажлары өз нәтийжесин береди, деп ойлаймыз.
Илажда басқарма қәнигелери тәрепинен оқыўшыларға нәшебентлик затларды аэропорттан алып өтиўге қарсы гүресиў бағдарында алып барылған арнаўлы ҳәрекетлер ҳаққында айтып берилди.
Республикамыздың барлық район ҳәм қалаларындағы улыўма билим бериў мектеплеринде өткерилип атырған дөгерек сәўбетлеринде нәшебентликтиң инсанның денсаўлығына, санасына, турмыс тәризине кери тәсири, бул иллет соңында адамды өлимге, жәмийеттиң ыдыраўына алып келетуғыны турмыслық мысаллар тийкарында түсиндирип берилмекте.
Мектепте айлық шеңберинде сүўретлер таңлаўы өткерилип, оқыўшылар нәшебентлик, оған қарсы гүресиў темасындағы сүўретлери менен қатнасты.
Н.Елмуратова.
«Нөкис» станциясы бөлиминиң профилактика инспекторы, майор
Қарақалпақстан хабар агентлиги