4-февраль күни Тахтакөпир районлық Халық билимлендириў бөлимине қараслы 3-санлы улыўма орта билим бериў мектебинде 7-8-класс оқыўшылары арасында тәрбия пәнинен Қарақалпақстан Республикасы көлеминде «Тахтакөпир районы ҳәкими кубоги» ашық олимпиадасы өткерилди.
Оған Нөкис қаласы ҳәм барлық районлардан қалалық ҳәм районлық басқышта жеңимпаз болған 52 оқыўшы қатнасты.
Олимпиада 2 турда өткерилип, оның жуўмағында биринши орынды Тахтакөпир районлық Халық билимлендириў бөлимине қараслы 3-санлы улыўма орта билим бериў мектебиниң 7-класс оқыўшысы Айдана Насирова, екинши орынды Шымбай районлық Халық билимлендириў бөлимине қараслы 36 -санлы мектептиң 8-класс оқыўшысы Досулла Гайбуллаев, үшинши орынды Нөкис районлық Халық билимлендириў бөлимине қараслы 17-санлы мектептиң 8-класс оқыўшысы Асел Жалғасбаева жеңип алыўға миясар болды.
Жеңимпаз оқыўшылар ҳәм олардың устазлары Тахтакөпир районы ҳәкимлиги тәрепинен қымбат баҳалы саўғалар ҳәм Ҳүрмет жарлығы менен сыйлықланды.
Адилбай Оразов,
Қарақалпақстан хабар агентлиги шолыўшысы