Өзбекстан мәмлекетлик денетәрбиясы ҳәм спорт университети Нөкис филиалында «Белгили мәмлекетлик ғайраткер, Өзбекстан Қаҳарманы Муса Тәжетдинович Ерниязов – жаслар қәлбинде» атамасында илаж өткерилди.
Быйылғы жылдың 2-декабрь күни Өзбекстан Республикасы Министрлер Кабинетиниң «Белгили мәмлекетлик ғайраткер, Өзбекстан Қаҳарманы Муса Тәжетдинович Ерниязовтың 75 жыллығын кең түрде белгилеў ҳаққында»ғы қарарына бола, республикамыздағы барлық жоқары оқыў орынларында, улыўма орта билим бериў мектеплеринде, мәкеме-кәрханаларда усындай илажлар болып өтпекте.
Илажда шығып сөйлеген профессор-оқытыўшылар ҳәм белсенди студент-жаслар мәмлекетлик ғайраткер, ел ағасы М.Ерниязовтың өмир жолы, республикамызда социаллық-экономикалық ҳәм басқа да тараўларда әмелге асырған жумыслары, жоқары мәртебели пазыйлетлерине кең түрде тоқтап өтти.
Ҳәр қандай инсанның ел-журты ушын ислеген хызметлери, ийгиликли мийнети, қайырлы ислери өзине сондай уллылық бағышлайды, арадан жыллар, ҳәттеки әсирлер өтсе де, оның исми тиллерде дәстан, өмир ҳәм мийнет жолы келешек әўладқа өрнек болып қала береди. Сонлықтан да, инсан өлсе де, оның аты өшпейди, жүрегимизде мәңги сақланып қалады.
Тарийхқа нәзер тасласақ, 2000-жыллардың басларында пүткил Қарақалпақстанда суўсызлық байқалған еди. Тийкарғы кәсиби дийқаншылық, шарўашылық болған халқымыз сол жыллары үлкен қыйыншылықты басынан өткерди. Қарақалпақстанның экономикасын көтериў, халқымыздың турмысын жақсылаў ўазыйпасы басшының алдында турған еди. М.Ерниязов усы ўазыйпаларды орынлай алған, көзге көринген мәмлекетлик ғайраткер болып табылады. Усындай қыйыншылық дәўиринде халқымызды жақты күнлерге алып шығыўда, республикамыздың ерискен табыслары менен нәтийжелеринде ҳақылы түрде М.Ерниязовтың тынымсыз мийнетлери сиңгенин халқымыз жақсы биледи. Ол тек ғана Қарақалпақстанда емес, ал, Өзбекстан көлеминде де үлкен ҳүрмет пенен абырай-мәртебеге ийе болған шахс ҳәм ғайраткер сыпатында танылған еди. Соның ушын да оған ҳүрмет көрсетип, халқымыздың мәрт перзенти сыпатында еслеўимиз керек.
Илаж соңында жыйналғанларға М.Ерниязовтың өмири ҳәм уллы хызметлери ҳаққындағы ҳүжжетли фильм қойып берилди.
Қарақалпақстан хабар агентлиги