АҚШ президентлиги ушын гүресте жеңилген демократ Камала Харрис сайлаўда жеңиске ерискен республикашы қарсыласы Дональд Трампқа қоңыраў етип, оны қутлықлады ҳәм жеңилгенин тән алды.
Харристың жәрдемшилеринен бири CNN телеканалына билдириўинше, вице-президент ҳәкимият тыныш жол менен алмасыўы кереклигин атап өткен ҳәм Трамп барлық америкалылардың президенти болыўынан үмитли екенин айтқан.
Сайлаўдағы утылысын рәсмий тән алған Харрис бүгин жергиликли ўақыт пенен саат 16:00де сөйлеп, сайлаў нәтийжелерине баҳа бериўи күтилмекте.
Еслетип өтемиз, 5-ноябрь күни АҚШта болып өткен президентлик сайлаўында Дональд Трамп жетерли даўыс алып, және мәмлекет президенти болыў ҳуқықын қолға киргизди.
Ол 2025-жылы 20-январьда рәсмий ант қабыл етеди.
Қарақалпақстан хабар агентлиги