Өзбекстан Республикасы Президенти Шавкат Мирзиёевтиң мирәт етиўине бола Әзербайжан Республикасы Президенти Илҳам Алиев быйыл 21–22-июнь күнлери мәмлекетлик сапар менен мәмлекетимизде болады.
Саммит күн тәртибинен Өзбекстан – Әзербайжан стратегиялық шериклик қатнасықларын және де беккемлеў ҳәм көп қырлы бирге ислесиўди кеңейтиў мәселелери орын алған.
Еки мәмлекет жетекшилери өз-ара саўда көлемин арттырыў, исбилерменлер ҳәм аймақлар дәрежесинде кооперация байланысларын күшейтиў, экономиканың ҳәр қыйлы тармақларында биргеликтеги инвестициялық жойбарларды әмелге асырыў, транспорт-транзит тараўындағы имканиятлардан нәтийжели пайдаланыў, жедел мәдений-гуманитарлық алмасыўларды даўам еттириўге айрықша итибар қаратады.
Буннан тысқары, мәмлекет басшылары халықаралық ҳәм регионаллық жағдай бойынша пикир алысады, ҳәр тәреплеме структуралар шеңберинде жедел сөйлесиўди раўажландырыў ҳәм өз-ара қоллап-қуўатлаў мәселелерин додалайды.
Жоқары дәрежедеги сөйлесиўлер жуўмағында санаат, транспорт, аўыл хожалығы, энергетика, илим ҳәм инновациялар, туризм ҳәм басқа да тараўларда әмелий бирге ислесиўди беккемлеўге қаратылған еки тәреплеме ҳүжжетлердиң салмақлы топламына қол қойыў нәзерде тутылған.
Сапар алдында Ташкент қаласында Өзбекстан ҳәм Әзербайжанның жетекши компания ҳәм кәрханаларының қатнасыўында исбилерменлик илажлары болып өтип атырғанын атап өтиў орынлы.
Кейинги жыллары еки тәреплеме саўда көрсеткишлери өсип, қоспа кәрханалар саны сезилерли дәрежеде көбейди. 2021-жылы товар алмасыў көлеми 42 процентке, быйыл январь-май айларында 49 процентке өсти.
Өткен жылы Әзербайжан аймағында елимиз автомобильлерин жыйнаў бойынша өндирис майданшасы иске қосылды. Пилле жетистириў, аграр комплекс, қурылыс материаллары санааты, нефть-газ, фармацевтика ҳәм азық-аўқат тармақларында жаңа кооперациялық жойбарлар әмелге асырылмақта ҳәм ислеп шығылмақта.
Мәмлекетлеримизде еки тәрелеме мәдений илажлар, илимий әнжуманлар, презентациялар ҳәм дөретиўшилик ушырасыўлар турақлы өткерип келинбекте.
ӨзА