Қазақстан Республикасының Алма-ата қаласында Орайлық Азия мәмлекетлери жоқары оқыў орынлары ректорларының биринши форумына Өзбекстан делегациясы қурамында Бердақ атындағы Қарақалпақ мәмлекетлик университетиниң ректоры, профессор А.Реймов та қатнасып қайтты.
Форумның тийкарғы мақсети Орайлық Азия мәмлекетлери жоқары оқыў орынларының халықаралық бирге ислесиўин кеңейтиў, алдыңғы тәжирийбелерди үйрениў арқалы бир қатар жаңалықлар жаратыў болып табылады.
Илаж қатнасыўшылары теориялық билимлерин әмелиятта сынап көриў мақсетинде К.И.Сатбаев атындағы Қазақстан миллий техника университетиниң Кәншилик-металлургия институтында болып, бул жердеги оқыў-лаборатория жумыслары менен жақыннан танысты. Абай атындағы Қазақ миллий педагогикалық университетинде ушырасыў өткерилип, бирге ислесиў мәселелери көрип шығылды.
Форум шеңберинде Ал-Фарабий атындағы Қазақстан миллий университетиниң журналистика факультетинде халықаралық конференция болып өтти. Илаж даўамында Қазақстан миллий университети ҳәм Қарақалпақ мәмлекетлик университетиниң арасында бирге ислесиў бойынша шәртнамаға қол қойылды.
Еки күн даўам еткен форум биринши мәрте өткерилип атырғанына қарамастан, жасларға билим бериўди жетилистириў, профессор-оқытыўшылардың тәжирийбесин арттырыўда айрықша әҳмийетке ийе болды.
Қарақалпақстан хабар агентлиги