USAID Нөкис қаласында Республикамыз ҳаял-қызларына IT тараўын үйрениў ушын үлкен имканият жаратты.
Яғный, USAID тың Агробизнести раўажландырыў жойбары тийкарында республикамызда “IT Women Karakalpakstan” оқыў бағдарламасын ислеп шықты.
Оқыу бағдарламасында қатнасыўға ҳаял-кызлар арасында таңлаў өткерилмекте. Оны өткериўден мақсет, Қарақалпақстанда IT тараўы бойынша қәнигелерди таярлаў, басқа мәмлекетлер менен байланыслар орнатыў ҳәм ҳаял-қызлардиң бул тараўға қызығыўшылығын буннан былай да арттырыў болып табылады. Жойбарда ҳаял-қызлардың бәнтлигин тәмийинлеў, оларға бос жумыс орынларын жаратыў ҳәм IT тараўы бойынша жақсы қәнигелерди таярлаў баслы ўазыйпа етип белгиленген.
“IT Women Karakalpakstan” оқыў жойбары 18 жастан 30 жасқа шекемги барлық IT тараўына қызығыўшы, МKT бойынша басланғыш билимге ийе ҳаял-қызларды бийпул оқытыўды нәзерде тутқан.
Бул жойбар СММ ҳәм график дизайн сыяқлы бағдарларды өз ишине алады. Онда тийкарынан усы бағдарлар бойынша 60 ҳаял-қызды таңлаў тийкарында қабыллаў, оларды 5 ай даўамында бийпул IT тараўына оқытыў ҳәм оларды жумыс пенен тәмийинлеў режелестирилген.
IT парк Қарақалпақстан филиалы директоры Мәдияр Елмуратовтың атап өткениндей, бул таңлаўға 461 ҳаял-қыз арза тапсырды ҳәм олар биринши таңлап алыў басқышына жолламаны қолға киргизди.
Таңлап алыў басқышы еки күн даўамында өткерилди. Биринши басқышта қатнасыўшылардың IT тараўы бойынша басланғыш билими тест арқалы тексерилип, 126 ҳаял-қыз екинши басқышта қатнасыў ҳуқықын қолға киргизди.
Екинши басқыш 17-май күни болып өтти, онда қатнасыўшылардың инглиз тили бойынша билим дәрежеси көзден өткерилди.

Ең жақсы деп табылған ҳаял-қызлар менен Нөкис қаласында IT парк жәрдеминде усы жыл май-июнь айларында оқыў-тренинглер болып өтеди.

Арыўхан НУРАТДИНОВА,
Дилназ ӨМИРБАЕВА,
ҚМУ журналистика бағдарының 1-курс студентлери.

Қарақалпақстан хабар агентлиги