Бердақ атындағы Қарақалпақ мәмлекетлик университетинде Еслеў ҳәм қәдирлеў күни мүнәсибети менен кураш бойынша ректор кубоги ушын ашық жарыс болып өтти.
Ерлер арасында тийкарынан төрт салмақ категориясында өткерилген жарысқа республикамыздан тысқары, қоңсылас Хорезм ҳәм Бухара ўәлаятларынан 100 ге шамалас палўан қатнасты. Жарыс жуўмағында 66 килограмм салмақ категориясында Әмиўдәрья районынан Жорабек Ешмуратов, 73 килограмм салмақ категориясында Хорезм ўәлаятынан Изатулла Рахимбоев, 81 килограмм салмақ категориясында Қарақалпақ мәмлекетлик университетинен Абызатдин Алхамов ҳәм 81 килограммнан жоқары салмақ категориясында Қоңырат районынан Эргаш Айтбаевлар биринши орынларды ийеледи.
Жарыс жеңимпазларын Бердақ атындағы Қарақалпақ мәмлекетлик университетиниң проректоры Азамат Қудайбергенов, Өзбекстан кураш федерациясы Қарақалпақстан бөлиминиң атқарыўшы директоры Серик Жүсипбеков қутлықлап, сыйлы орын ийелерине ректор ҳәм спорт клубы тәрепинен естелик саўғалары тапсырылды.
Жулдыз ҚЫДЫРБАЕВА,
Өзбекстан мәмлекетлик денетәрбия ҳәм спорт университети Нөкис филиалының студенти
Қарақалпақстан хабар агентлиги