Нөкисте әдиллик сейили өткерилди

Қарақалпақстан Республикасы Әдиллик министрлиги тәрепинен Нөкис қаласындағы «Истиқлол» балалар дем алыў орайында «Инсан қәдири ушын» сүрени астында дәстүрге айланған әдиллик сейили болып өтти.

Илаждан гөзленген тийкарғы мақсет, халықтың ҳуқықый санасы ҳәм мәдениятын арттырыў, нызамлылықты беккемлеў, мәмлекетлик уйымлардың тийкарғы ўазыйпалары менен халықты хабардар етиў, келешегимиз ийелери болған жасларды Ўатанды сүйиўшилик руўхында тәрбиялаў, пуқараларға ҳуқықый, медициналық, психологиялық мәсләҳәт бериўден ибарат.

Быйылғы илаж «Саламатлық ушын 5000 қәдем» марафоны менен басланды. Онда Қарақалпақстан Республикасы Денсаўлықты сақлаў министрлиги, Миллий гвардияның Қарақалпақстан Республикасы бойынша басқармасы, Әдиллик министрлиги, басқада мәмлекетлик уйымлардың хызметкерлери, студент-жаслар қатнасты.

Сейил қатнасыўшыларына көтериңкилик бағышлаў мақсетинде бирге ислесиўши шөлкемлер менен биргеликте викториналар, мәденият ҳәм көркем өнер хызметкерлериниң концерт бағдарламалары, спорт жарыслары, көргизбелер, ярмаркалар, медициналық тексериўлер шөлкемлестирилди.

Мәмлекетлик суд, ҳуқық қорғаў уйымлары, банк хызметкерлери, адвокатлар, нотариуслар тәрепинен халықтың мүрәжаты тыңланып, ҳуқықый мәсләҳәтлер берилди.

Усы жылдың март айында «Әдиллик министрлиги исбилерменлерге дос» сүрени астында Өзбекстан Республикасы Әдиллик министри менен болған ушырасыўда Нөкис қаласындағы ҳәким жәрдемшилери аймақлардағы пуқараларды өзин-өзи бәнт етиў мақсетинде газ есаплағышлар менен тәмийинлеўде әмелий жәрдем сораған еди. Илажда исбилерменлик пенен шуғыллынаў тилегиндеги 20 пуқараға газ есаплағыш саўға ретинде берилди.

Сейил даўамында министрликтиң телеграм каналында усы жылдың 18-апрель күни «Денсаўлықты сақлаў ҳәм билимлендириў тараўы хызметкерлериниң ҳуқықын қорғаў» ҳуқықый акциясы шеңберинде халық билимлендириўи ҳәм денсаўлықты сақлаў системасы хызметкерлери арасында өткерилген «Ҳуқықыңызды билесиз бе?»викторинасының жеңимпазлары мүнәсип сыйлықланды.

Бердақ атындағы Қарақалпақ мәмлекетлик уинверситети студент-жасларынан ибарат «Street Lаw» топары ағзалары тәрепинен шөлкемлестирилген ҳуқықый викторинаға 400ге шамалас пуқара қамтып алынды. Оның жеңимпазларына саўғалар тапсырылды.

Соның менен бирге, илаж қатнасыўшылары арасында «Биз саламат турмыс тәрепдарымыз. Сиз де бизге қосылың» сүрени астында спорттың гүрес, оқжай атыў, шахмат, шашка түрлери бойынша жарыс өткерилди. Спортшылардың көргизбели шығыўлары жасларда айрықша қызығыўшылық оятты. Илаж соңында оны шөлкемлестириў ҳәм өткериўге жақыннан жәрдем берген кәрхана, мәкеме, оқыў орынларының ўәкиллерине миннетдаршылық билдирилди.