Қарақалпақстан Республикасы тарийхы ҳәм мәденияты мәмлекетлик музейинде заманагөй сүўретлеў көркем өнери ўәкили талантлы жас художник Тимур Сулаймановтың «Реңлер драматургиясы» атамасында биринши жеке көргизбеси шөлкемлестирилди.

Көргизбеде жас реалист ҳәм импрессионист художник Т.Сулаймановтың дөретиўшилигине тийисли болған портрет, натюрморт, пейзаж жанрындағы 50 ге шамалас картиналар қойылған.

Көргизбениң ашылыў мәресиминде художниктиң өмири ҳәм дөретиўшилиги туўралы мағлыўматлар берилди. Атап өтилгениндей, Т.Сулайманов заманагөй сүретлеў көркем өнериниң реалист ҳәм импрессинист художниги болып есапланады.

Оның картиналары «Аўылдағы үйим», «Регистан», «Шохи зинда», «Гүзги көринис», «Бөршитаў», «Гәўирқала», «Академик Сәрсен аға портрети» (графика), «Азат аға портрети», «Балықшы Сапарнияз аға портрети» ҳәм басқалар. Соның менен бирге, художниктиң Өзбекстан ҳәм Қарақалпақстан халық шайыры Т.Жумамуратов, Қарақалпақстан халық жазыўшысы Ә.Тәжимуратов, шыпакер А.Досназаровлардың портретлери бүгинги күнде Қарақалпақстан Республикасы тарийхы ҳәм мәденияты музейи коллекциясынан орын алған.

Талантлы жас художниктиң бул көргизбеси Қарақалпақстан Республикасы тарийхы ҳәм мәденияты мәмлекетлик музейи ҳәм Өзбекстан көркем өнер Академиясы дөретиўшилер аўқамының «Халықаралық сүўретлеў ҳәм өнерментшилик» фестивалы шеңберинде шөлкемлестирилмекте.

Қарақалпақстан хабар агентлиги.

М.Ҳабибуллаевтың түсирген сүўретлери