Халық билимлендириў министрлиги жуўмақлаўшы мәмлекетлик аттестациясы қайсы пәнлерден болатуғынын мәлим етти.
Халық билимлендириў министрлигиниң 2022-жыл 28-февральдағы 70-санлы буйрығына тийкарланып 2021-2022-оқыў жылында улыўма билимлендириў мектеплериниң 9-класс питкериўшилери ушын: ана тили ҳәм әдебият, өзбек тили/рус тили, математика, тарийх, денетәрбия ҳәм қосымша түрде оқыўшылардың таңлаўы тийкарында белгиленген пән бойынша;
11-класс питкериўшилери ушын: ана тили ҳәм әдебият, математика, шет тили, тарийх ҳәм қосымша түрде оқыўшылардың таңлаўы тийкарында белгиленген пән бойынша жуўмақлаўшы мәмлекетлик аттестация өткерилетуғыны белгиленди.
Улыўма билимлендириў мектеплеринде тәлим берилетуғын барлық тиллерде жуўмақлаўшы мәмлекетлик аттестациялар өткерилетуғын пәнлер бойынша үлги қадағалаў материаллары Республикалық билимлендириў орайы тәрепинен таярланып, билимлендириў орайының рәсмий сайтында жәрияланады, делинеди хабарда.
Қарақалпақстан хабар агентлиги