Өзбекстан Республикасы Президенти Шавкат Мирзиёевтиң мирәт етиўине бола Түркия Республикасы Президенти Режеп Таййип Эрдоган 29-30-март күнлери рәсмий сапар менен мәмлекетимизде болады.
Жоқары мәртебели мийман сапар етиў шеңберинде жоқары дәрежедеги Өзбекстан – Түркия стратегиялық шериклик кеңесиниң екинши мәжилисинде қатнасады.
Өзбекстан ҳәм Түркия жетекшилери өткеретуғын сөйлесиўлердиң күн тәртибинен еки тәреплеме дослық ҳәм стратегиялық шериклик қатнасықларын буннан былай да раўажландырыў ҳәм беккемлеў, мәмлекетлеримиз арасындағы көп қырлы бирге ислесиўди кеңейтиў мәселелери орын алған.
Тийкарғы итибар саўда, инвестициялар, инновациялар, санаат, логистика, туризм ҳәм экономиканың басқа да тармақларында қоспа кооперация жойбарларын алға қойыў, мәдений-гуманитарлық алмасыў бағдарламаларын әмелге асырыўға қаратылады.
Халықаралық ҳәм регионаллық сиясаттың әҳмийетли тәреплери бойынша пикир алысылады.
Саммит жуўмағында Биргеликтеги билдириў ҳәм бир қатар еки тәреплеме ҳүжжетлердиң қабыл етилиўи режелестирилген.
Қарақалпақстан хабар агентлиги