Инновацион ривожланиш вазири ўринбосари Ойбек Норинбоев ва вазирнинг маслаҳатчиси Карстен Хайнц Эстониянинг мамлакатимиздаги Фавқулодда ва мухтор элчиси Арти Хилпусни қабул қилди.
Элчи Ўзбекистонда кейинги йилларда амалга оширилаётган ислоҳотлар натижасида икки давлат ўртасидаги муносабатларнинг янги қирралари очилаётгани, уни янада мустаҳкамлаш, хусусан, инновация соҳасида кенг кўламли ҳамкорликни йўлга қўйиш учун барча имконият мавжудлигини таъкидлади.
Ўтган йил октябрь ойида ўтказилган “Innoweek” инновацион ҳафталигида Эстония делегацияси иштирок этиб, икки томонлама қатор меморандумлар имзолангани соҳадаги ҳамкорликнинг бошланиши бўлгани қайд этилди.
О.Норинбоев мамлакатимизда кўплаб йўналишларда инновацияларни жорий этиш бўйича амалий ишлар қилинаётганини таъкидлади. Вазир маслаҳатчиси Карстен Хайнц ўзини Ўзбекистондаги кадрлар сиёсати “инновацияси”, яъни германиялик амалдорнинг хорижий мамлакатда юқори ловозимни эгаллаган мансабдор эканини қайд этди.
Эстония элчиси ўз мамлакатида яратилган ва бугунги кунда Финляндия, Украина, Қозоғистон каби кўплаб давлатларда жорий қилинган электрон ҳукумат ва электрон тиббиётни Ўзбекистонга ҳам татбиқ этиш бўйича ҳамкорлик қилиш ниятида эканини билдирди.
– Эстонияда фақат онлайн турмуш қуриш ва ажралиш мумкин эмас, қолган барча ҳужжатларни электрон тўлдириб, тегишли идораларга жўнатиш мумкин, – деди Арти Хилпус. – Солиқ тизимидаги айрим имтиёзлардан фойдаланиш учун солиқ декларациясини ўз вақтида тўлдириш талаб этилса, шифокорлар ёзиб берадиган дорилар рўйхати ва касаллик варақаларининг тўлиқ электрон шаклга ўтказилгани бир-бирига зид ёки беморга ман этилган дори воситаларининг буюрилиши эҳтимолини автоматик тарзда йўқ қилади.
Учрашувда Ўзбекистонда электрон ҳукуматни жорий этиш бўйича қатор ишлар қилингани, аммо уни такомиллаштириш бўйича эстонияликларнинг тажрибасини ўрганиш муҳимлиги қайд этилди.
Элчи вазирлик вакилларини шу йил 20-21 май кунлари Таллинда ўтадиган конференцияда иштирок этиш учун таклиф этди.
ЎзА