Қорақалпоғистон Республикаси Мудофаа ишлари бошқармаси ҳузуридаги чақирилувчиларни ҳарбий-техник мутахассисликлар бўйича тайёрлаш маркази ўз фаолиятини 2019 йилдан бошлаб, бугунги кунга қадар икки юз нафардан ортиқ тайёр мутахассисларни Қуролли Кучлар сафига етказиб берди.

Марказ армия учун “В” ва “С” тоифасидаги енгил ва оғир ҳарбий автомобилларни бошқарадиган ҳайдовчилар, “Дизелчи-электрик” ва “Ошпазлар”ни  тайёрлаб беради.

Таъкидлаш жоизки, марказда таълим олаётган курсантларннг озиқ-овқат, кийим-кечак ва маиший таъминоти давлат бюджети томонидан қопланади. Ҳар йили марказ 110 нафар қорақалпоғистонлик ёшларга таълим-тарбия бериб, касбга ўқитади ҳамда армия сафларига кетиш учун тайёрлаб беради. Ўқиш муддати уч ой бўлиб, унда аниқ, гуманитар-ижтимоий, техник ҳамда бошқа фанлар билан бир қаторда дастлабки ҳарбий тайёргарлик ҳам ўқитиб борилади. Демакки, бу ерни тамомлаган ёшлар ҳарбийча ҳаёт тарзига анчагина кўникиб, армия сафларига йўл олади.

Курсантларнинг сифатли таълим олиши ҳамда мутахассислик эгаллаши учун 10 дан ортиқ ўқув хонаси, пневматик милтиқдан ўқ отиш учун тир, техникаларни сақлаш бокслари, спорт зали, кутубхона, ётоқхона, ошхона ҳамда бошқа маиший иншоотлар мавжуд. Марказдаги мавжуд лабораториялардаги ўқув-машқ техникаларидан кенг фойдаланилади. Таълим-тарбия жараёнига 8 нафар ўқитувчи ҳамда 4 нафар йўриқчи жалб этилган. Ёшлар билан ҳам жамоавий, ҳам индивидуал ишлаш тамойили асосида машғулотлар олиб борилмоқда.

Уч йўналишда таҳсил олаётган курсантлар гуруҳининг ҳар бирига 20 нафардан ёшлар жалб этилган. Алоҳида айтиш лозимки, мазкур таълим муассасасини тамомлаган курсантлар биринчилар қатори таълим олган мутахассислиги бўйича муддатли ҳарбий хизматга олинади.

Техникаларни амалий бошқаришни ўргатиш учун марказда 3 та юк ҳамда 2 та енгил автомобиль мавжуд бўлиб, Нукус шаҳри четида жойлашган автодром ҳамда муассасадаги майдонда мунтазам машқлар бажариб келинади.

Албатта, бунда аввал курсантлар машғулотларни электрон тренажёрларида бажариб, шундан кейингина маҳоратини дала-ўқув майдонида мустаҳкамлайди.

Курсантларнинг жисмонан баркамол бўлиб вояга етиши ҳамда соғлом турмуш тарзини одат қилиб бориши учун марказ қошида фаолият юритаётган бокс, қўл жанги, ўқ отиш спорти ҳамда авиамоделчилик тўгаракларининг ўрни муҳим бўлмоқда.

Марказда таҳсил олиш учун номзодлар туман, шаҳар мудофаа ишлари бошқармасига мурожаат этиши ҳамда белгиланган саралаш босқичларидан ўтиши керак бўлади. Энг сара йигитлар ушбу таълим муассасаларига ўқишга қабул қилинади.

Яқинда Қорақалпоғистон Республикаси Мудофаа ишлари бошқармаси ҳузуридаги чақирилувчиларни ҳарбий-техник мутахассисликлар бўйича тайёрлаш марказида ўқувчиларнинг битируви муносабати билан тантанали маросим бўлиб ўтди.

Унда ҳарбий хизматчилар ҳамда битирувчиларнинг яқинлари қатнашди.

Маросимда ҳарбий хизматга қадар тайёрлов курсларини ўтаган ҳамда мутахассисликка эга бўлган ёшларга тегишли сертификатлар тантанали тарзда топширилди.

Бу ҳақда Шимоли-ғарбий ҳарбий округ матбуот хизмати хабар берди.

Тадбир давомида намунали ҳулқи, ўқишда эришган ютуқлари билан алоҳида ажралган бир гуруҳ ёшлар марказ маъмуриятининг фахрий ёрлиқлари билан тақдирланди.

Нукус гарнизони ҳарбий оркестри, ҳарбий қисм фахрий қоровул взводи ҳамда марказ битирувчилари томонидан тайёрланган кўргазмали чиқишлар тантанага байрамона кайфият туҳфа этди.

Мутахассисликка эга бўлган ёшлар она Ватанни кўз қорачиғидек асрашга, эл-юртимиз, халқимизга хизмат қилишга ваъда берди.