Қорақалпоғистон Республикаси бўйича жами 16601 та корхона мавжуд бўлиб, карантин даврида 2825 корхона фаолият юритмаётган эди. Қорақалпғистон Республикаси Давлат солиқ бошқармаси Ахборот хизматининг маълум қилишича, ҳозирда 857 та корхона фаолияти қайта тикланди.
Карантин шароитида мамлакатимизда фаолият юритиб келаётган кўплаб корхоналар фаолиятларини тўхтатиб туришга мажбур бўлган эди. Шунингдек, айримлари карантин қоидаларига қатъий амал қилган эл хизмати йўлида ишлашда давом этди.
Жумладан, Қорақалпоғистон Республикаси Элликқалъа туманидаги “BOʻSTON CLUSTER” МЧЖ га қарашли “Бўстон оптимал текстиль” цехи жорий йилнинг апрель ойидан иш бошлади. Натижада, 100 нафар киши иш ўрни билан таъминланди.
Корхонада ҳар куни дезинфекция қоидаларига қатъий амал қилинган ҳолда иш бошланишидан олдин ишчиларнинг тана ҳарорати ўлчаниб, иш жараёни давомида карантин тартиб-қоидаларига амал қилиниши назорат қилинмоқда. Уларга қулайлик яратиш мақсадида, иссиқ овқат ва кундалик қатнаш учун автобуслар қатнови йўлга қўйилган.
̶ Корхонамизнинг лойиҳа қуввати 5000 тонна пахтани қайта ишлашга мўлжалланган, ̶ дейди унинг раҳбари Темур Казаков. ̶ Жорий йил давомида 3 минг 500 тонна ип-калава ва сочиқ маҳсулотларини ишлаб чиқаришни режалаштирмоқдамиз. Шунингдек, шу йили экспорт ҳажмини 5 миллион долларга оширишни ўз олдимизга мақсад қилганмиз.
Маълумот ўрнида таъкидлаш жоизки, туманда жами 1232 корхона мавжуд бўлиб, шундан карантин вақтида 180 таси ўз фаолиятини тўхтатиб турган эди. Бугундан эса 38 корхона ўз ишини бошлаб юборди. Уларнинг ишга тушиши билан 737 нафар элликқалъалик яна ўзларининг севимли ишларига қайтди.
Довуд АБИБУЛЛАЕВ, ЎзА