Саудия Арабистонининг Ар-Риёд шаҳрида футбол бўйича Италия Суперкубогининг финал ўйини ўтказилди. Унда Милан шаҳрининг икки жамоаси «Интер» ва «Милан» клублари ўзаро куч синашди.
«Al-Awwal Park» стадионида ташкил этилган мазкур баҳсда “Интер” клуби аъзолари Мартинес (45+2) ва Тареми (47) гол уриб, жамоасини 2:0 ҳисобида олдинга олиб чиқди.
Бироқ “Милан” жамоаси футболчилари бу ҳолатдан тушкунликка тушмади ҳамда ўйин тизгинини ўз қўлига олиб, Тео Эрнандес (52), Пулишич (80), Абраҳам (90+2) голлари эвазига ғалабани илиб кетди.
Шу тариқа, “Милан” Италия Суперкубоги ғолибига айланди. Шуни таъкидлаб ўтишимиз керак, Консейсау бошчилигидаги “Милан” клуби мазкур кубокни ўз тарихида саккизинчи бор қўлга киритди.
***
Испания кубоги доирасида «Реал Мадрид» ва «Депортиво Минера» баҳси бўлиб ўтди. Унда Мадрид клуби рақибини 5:0 ҳисобида таслим этди. Шу тариқа, “Реал Мадрид” 1/8 финал босқичига йўл олди.
***
Саудия Арабистонида футбол бўйича Қирол кубогининг чорак финалида «Ал Шабаб» ҳамда «Ал Фейҳа» клублари ўзаро рақобатлашди. Унда «Ал Шабаб» жамоаси «Ал Фейҳа»ни 2:1 ҳисобида тасли қилди.
Учрашувда Ўзбекистон терма жамоаси аъзоси Отабек Шукуров “Ал Фейҳа” таркибида майдонга тушиб, жамоанинг Салеҳ томонидан киритилган ягона голига ассистлик қилди.
***
«Сўғдиёна» 20 январь кунидан бошлаб қишки ўқув-машғулот йиғинини Дубай шаҳрида ўтказади. Ушбу йиғин доирасида «Сўғдиёна» «Ростов» (Россия), «Рига» (Латвия) ва «Ауда» (Латвия) жамоалари билан назорат ўйинини ўтказади.
***
Ўзбекистон миллий терма жамоаси жорий йилнинг 20-31-январь кунлари Қатарнинг Доҳа шаҳрида навбатдаги ўқув-машғулот йиғинини ўтказади. Терма жамоамизнинг мураббийлар штаби томонидан мазкур йиғинга яна икки нафар ҳимоячи — Умар Эшмуродов ва Асадбек Раҳимжонов ҳам жалб этилди.
Эслатиб ўтамиз, жамоамиз йиғин доирасида 27 январь куни Иордания термасига қарши ўртоқлик ўйинида майдонга тушади.
***
Қувайтда ўтказилган араб мамлакатлари ўртасидаги Кўрфаз кубоги финалида Баҳрайн терма жамоаси Ўмон термасини 2:1 ҳисобида таслим қилиб, мусобақа ғолибига айланди.
Жавоҳир Тошхўжаев, ЎзА