Saudiya Arabistonining Ar-Riyod shahrida futbol bo‘yicha Italiya Superkubogining final o‘yini o‘tkazildi. Unda Milan shahrining ikki jamoasi “Inter” va “Milan” klublari o‘zaro kuch sinashdi.
“Al-Awwal Park” stadionida tashkil etilgan mazkur bahsda “Inter” klubi a’zolari Martines (45+2) va Taremi (47) gol urib, jamoasini 2:0 hisobida oldinga olib chiqdi.
Biroq “Milan” jamoasi futbolchilari bu holatdan tushkunlikka tushmadi hamda o‘yin tizginini o‘z qo‘liga olib, Teo Ernandes (52), Pulishich (80), Abraham (90+2) gollari evaziga g‘alabani ilib ketdi.
Shu tariqa, “Milan” Italiya Superkubogi g‘olibiga aylandi. Shuni ta’kidlab o‘tishimiz kerak, Konseysau boshchiligidagi “Milan” klubi mazkur kubokni o‘z tarixida sakkizinchi bor qo‘lga kiritdi.
***
Ispaniya kubogi doirasida “Real Madrid” va “Deportivo Minera” bahsi bo‘lib o‘tdi. Unda Madrid klubi raqibini 5:0 hisobida taslim etdi. Shu tariqa, “Real Madrid” 1/8 final bosqichiga yo‘l oldi.
***
Saudiya Arabistonida futbol bo‘yicha Qirol kubogining chorak finalida “Al Shabab” hamda “Al Feyha” klublari o‘zaro raqobatlashdi. Unda “Al Shabab” jamoasi “Al Feyha”ni 2:1 hisobida tasli qildi.
Uchrashuvda O‘zbekiston terma jamoasi a’zosi Otabek Shukurov “Al Feyha” tarkibida maydonga tushib, jamoaning Saleh tomonidan kiritilgan yagona goliga assistlik qildi.
***
“So‘g‘diyona” 20 yanvar kunidan boshlab qishki o‘quv-mashg‘ulot yig‘inini Dubay shahrida o‘tkazadi. Ushbu yig‘in doirasida “So‘g‘diyona” “Rostov” (Rossiya), “Riga” (Latviya) va “Auda” (Latviya) jamoalari bilan nazorat o‘yinini o‘tkazadi.
***
O‘zbekiston milliy terma jamoasi joriy yilning 20-31-yanvar kunlari Qatarning Doha shahrida navbatdagi o‘quv-mashg‘ulot yig‘inini o‘tkazadi. Terma jamoamizning murabbiylar shtabi tomonidan mazkur yig‘inga yana ikki nafar himoyachi — Umar Eshmurodov va Asadbek Rahimjonov ham jalb etildi.
Eslatib o‘tamiz, jamoamiz yig‘in doirasida 27 yanvar kuni Iordaniya termasiga qarshi o‘rtoqlik o‘yinida maydonga tushadi.
***
Quvaytda o‘tkazilgan arab mamlakatlari o‘rtasidagi Ko‘rfaz kubogi finalida Bahrayn terma jamoasi O‘mon termasini 2:1 hisobida taslim qilib, musobaqa g‘olibiga aylandi.
Javohir Toshxo‘jayev, O‘zA