Ўзбекистон Республикаси Соғлиқни сақлаш вазирлигининг “Фармацевтика маҳсулотлари хавфсизлиги маркази“ ДМ вa Россия Федерацияси Соғлиқни сақлаш вазирлиги Тиббий буюмларни экспертиза қилиш илмий маркази ўртасида ўзаро ҳамкорлик меморандуми имзоланди.
Москвада “Реглек 2024” халқаро конференцияси доирасида имзоланган ушбу меморандум икки томонлама алоқаларни мустаҳкамлаш, хусусан, фармацевтика маҳсулотлари хавфсизлиги соҳасида ўзаро тажриба алмашиш имкониятларини кенгайтиришга қаратилган. Унга кўра, томонлар дори воситалари ва тиббий буюмларни экспертизадан ўтказиш, сифат назоратини такомиллаштириш, ҳамда соҳа ходимлари малакасини ошириш йўналишида ҳамкорлик қилади.
Мазкур келишув Ўзбекистон ва Россия ўртасида фармацевтика ва тиббиёт соҳасидаги илмий-техник ҳамкорликни ривожлантиришда муҳим қадам ҳисобланади. Ҳамкорлик меморандуми доирасида икки давлат экспертлари ўртасида тажриба алмашиш дастурлари ва қўшма тадқиқотлар амалга оширилиши режалаштирилган.
***
Шу кунларда “Фармацевтика маҳсулотлари хавфсизлиги маркази“ ДМнинг Вакциналар, зардоб препаратлари ва микробиологик таҳлил лабораторияси мутахассиси Феруза Жалилова PMDA – Япониянинг Фармацевтика ва тиббий буюмлар агентлиги томонидан ташкил этилган халқаро семинарда иштирок этмоқда.
Япониянинг Тояма префектурасида ўтаётган мазкур семинар халқаро даражадаги тартибга солувчи органлар мутахассислари учун мўлжалланган бўлиб, унинг асосий мақсади – доривор ўсимлик воситаларининг сифатини назорат қилиш, Япониядаги тартиб-қоидалар ва халқаро стандартлар билан таништиришдир.
Қатнашчилар семинар тренинг давомида Япония доривор ўсимликлар маркази ва доривор ўсимлик воситалари ишлаб чиқарувчи заводларга ташриф буюриб, ариза ҳужжатларини баҳолаш, сифатни бошқариш, шунингдек, ишлаб чиқариш жараёнлари билан яқиндан танишиш имконига эга бўлади.
Мутахассисимизнинг мазкур семинардаги иштироки ўзбек фармацевтлари учун халқаро тажрибага эга бўлиш ва доривор ўсимликлар соҳасидаги энг янги ёндашувларни ўзлаштиришда катта аҳамиятга эга. Бу орқали Фармацевтика маҳсулотлари хавфсизлиги марказининг халқаро миқёсда малака алмашиш имкониятлари янада кенгаяди, дейилади Марказ матбуот хизмати хабарида.
***
Фармацевтика маҳсулотлари хавфсизлиги марказининг Қиёслаш лабораториясига келиб тушган аризалар асосида жорий йилнинг октябрь ойи давомида жойига чиққан ҳолда, тиббиёт муассасаларидаги 336 та тиббий ўлчаш воситалари қиёслаш текширувидан ўтказилди.
Ўрганишлар давомида, улардан 267 тасига меъёрий ҳужжат талабларига мувофиқлиги бўйича қиёсланганлик гувоҳномаси, 50 тасига аттестация гувоҳномаси ҳамда номувофиқлиги аниқланган 19 та тиббий ўлчаш воситасига яроқсизлик баённомалари расмийлаштирилди ва ҳолат юзасидан масъулларга тегишли кўрсатма берилди.
Эслатиб ўтамиз, ССВнинг 2024 йил 7 октябрдаги 313-сонли буйруғига асосан, метрология текширувидан ўтказилиши лозим бўлган тиббиёт учун мўлжалланган ўлчаш ва синов воситаларининг рўйхатига мувофиқ, ўрнатилган тартибда метрологик текширувдан ўтказилмаган ўлчаш ва синов воситаларининг тиббиёт фаолиятида қўлланилиши таъқиқланади.
***
Марказда соҳада фаолият юритаётган тадбиркорлар билан учрашув бўлиб ўтди. Унда 2025 йилнинг 1 январидан кучга кирадиган фармацевтика маҳсулотларининг постмаркетинг назорати ва уни қандай тартибда амалга оширилиши юзасидан батафсил тушунтириш берилди.
Шунингдек, тадбирда марказ масъуллари Вазирлар Маҳкамасининг 2024 йил 4 октябрдаги “Ўзбекистон Республикасида алоҳида тоифадаги кучли таъсир қилувчи моддалар муомаласини тартибга солиш тўғрисидаги низомни тасдиқлаш ҳақида“ қарори мазмун моҳияти ҳақида тўхталиб, алоҳида тоифадаги кучли таъсир қилувчи моддаларни тиббиёт амалиётида қўллаш, сақлаш, уларнинг ноқонуний муомаласини чеклаш, жисмоний шахслар томонидан улардан фойдаланиш ҳамда уларни йўқ қилиш тартиблари ҳақида маълумот берди.
Мулоқот давомида тадбиркорлар, фармацевтика маҳсулотлари устидан постмаркетинг назорати, юртимизда дори воситаларини маркировкалаш ҳамда кучли таъсир қилувчи моддаларнинг хавфсиз муомаласини таъминлаш бўйича янги тартиб-қоидалар юзасидан ўзларини қизиқтирган саволларга жавоб олди.
Таъкидлаш жоизки, мазкур учрашув соҳа вакиллари томонидан янги қоидаларни ўз вақтида ва тўғри жорий этиш орқали фармацевтика маҳсулотларининг сифатини ошириш ҳамда халқ саломатлигини таъминлашга қаратилган саъй-ҳаракатларни янада мустаҳкамлашга хизмат қилади.
Моҳигул Қосимова, ЎзА