Самарқандда Шанхай ҳамкорлик ташкилотининг навбатдаги саммити жорий йил сентябрь ойида ўтказилади.

Мазкур халқаро форум олдидан юртимизда турли сиёсий, иқтисодий анжуманлар, маданий-маърифий тадбирлар бўлиб ўтмоқда.

Жумладан, шу йил 18-19 август кунлари мамлакатимиз ШҲТнинг навбатдаги Хотин-қизлар форумига мезбонлик қилади. Айни пайтда форумга қизғин ҳозирлик кўрилмоқда. Тадбир ўтказиладиган жойда ҳунармандчилик ва халқ амалий санъати кўргазмалари ташкил этилиши белгиланган.

Шунга кўра, “Ҳунарманд” уюшмаси Самарқанд вилояти бошқармаси зарур тайёргарлик ишларини амалга оширмоқда.

– Ушбу форумда вилоятимиздаги энг тажрибали ҳунармандлар ўзлари тайёрлаган 1000 турдаги маҳсулоти билан иштирок этади, – дейди “Ҳунарманд” уюшмаси вилоят бошқармаси бошлиғи Умид Ҳакимов. – Шунингдек, улар ўша ернинг ўзида ҳунармандчилик маҳсулотларини тайёрлаб, иштирокчиларга намойиш этиши режалаштириляпти. Ҳозирда ҳунармандлар ўзлари ясаган сара ҳунармандчилик буюмларини кўргазмага тайёрламоқда.

Батик санъати устаси Лола Ғаниева, каштадўз Мавлуда Ҳамдамова ҳамда зардўз Шавкат Зоҳидов кўргазмада янги маҳсулотлари билан қатнашиш ниятида.

– Батик, яъни турли хил матоларга гул босиш қўл меҳнатига асосланган нафис санъат тури ҳисобланади, – дейди Л.Ғаниева. – Бу санъатни онамдан ўрганганман. Гул босилган асарлар ўзига хос чиройга эга бўлиб, уни яратиш жараёни тўқиш, бўяш, гул босишни ўз ичига олади. Аёллар сумкалари, чойшаб, дастурхон, замонавий-миллий либосларда батик санъатини кенг қўллаймиз.  Кўргазмада 30 хилдан зиёд маҳсулотларим билан бирга яқинда тайёрлаган янги усулдаги ишим – матога исломий нақшли гуллар туширилган “санъат асари”мни намойиш этаман. Ўйлайманки, бу маҳсулот меҳмонларга манзур бўлади.

Зардўз Шавкат Зоҳидовнинг зар билан жило берилган зардўзлик буюмлари ҳам ҳозиргача кўпчиликнинг эътиборини қозонган.

– Зардўзлик ҳунари билан оилавий шуғулланамиз, – дейди Ш.Зоҳидов. – Мен бешинчи авлод вакилиман. Зардўзлик ўта машаққат ва сабр-тоқат талаб этадиган ҳунар. Бугунги кунгача ушбу ҳунарнинг заминдўз, шакардўз, гулдўз ва қуббадўз каби тикиш усулларини пухта ўргандим. Улар асосида миниатюралар, портретлар устида ишлаб, турли композициялар яратганман. Форумдаги кўргазмага улардан айримларини олиб бораман. Жумладан, кўпчилик хорижлик сайёҳлар зар билан жило берган ҳунармандчилик асарим – Ватанимиз гербига маҳлиё бўлган. Шу куни гербнинг янги нусхасини меҳмонлар гувоҳлигида тайёрлайман.

Ғ.Ҳасанов, ЎзА