Онлайн
Олий Мажлис Сенатининг йигирма тўққизинчи ялпи мажлиси бугун ўз ишини давом эттирмоқда.
Сенат раиси Танзила Норбоева бошқараётган мажлисда сенаторлар, вазирлик ва идоралар раҳбарлари, жойлардаги Сенат аъзолари ва масъул шахслар эса видеоконференция алоқа тизими орқали иштирок этмоқда.
Мажлис сенаторларнинг Сенат қарорлари ижроси ва бошқа муаммоли масалалар бўйича чиқишлари билан бошланди.
Ушбу масала доирасида сенаторларнинг жойларга чиқиб ўтказган ўрганишлари, аҳоли мурожаатлари бўйича олиб борган амалий ишлари натижаларига ҳам эътибор қаратилди.
Сенатнинг Мудофаа ва хавфсизлик масалалари қўмитаси раиси Қутбиддин Бурҳонов Тошкент вилояти Ўртачирчиқ туманидаги бир нечта қишлоқ аҳолиси узоқ йиллардан бери ичимлик суви масаласида қийналиб келаётганини, ушбу масалани ўрганиш натижаси бўйича «Ўзсувтаъминот» акциядорлик компаниясига сенатор сўрови юборилганини таъкидлади.
Сўров юборилганидан кейин сувдан қийналаётган ўша маҳаллаларга 12,7 км. сув қувурлари ётқизилган. Бироқ, одамларга сув тўлиқ етиб бормаган. Яъни иш ўлда-жўлда қолдирилган. Бу масала бўйича иккинчи бор сенатор сўрови юборилганда, «Ўзсувтаъминот» томонидан бу мақсадда маблағ ажратилмаганини баҳона қилинган.
Халқ манфаатини таъминлаш, аҳолини қийнаётган муаммоларга ечим топиш давлат даражасида талаб қилинаётган бир пайтда ишга совуққонлик билан қаралиши, одамлар учун ҳаёт-мамот бўлган сув муаммоси ҳал этилмаслиги, қолаверса, «Ўзсувтаъминот» акциядорлик компанияси раҳбарининг сенатор сўровига беписандлиги мажлисда танқид остига олинди.
Сенат раиси Т.Норбоева сенаторлар томонидан кўтарилаётган масалалар бежиз эмаслигини қайд этди. Президентимиз халқ розилигини энг устувор вазифа деб қўйганини унутмаслик, инсон қадрини нафақат улуғлаш, балки амалда таъминлаш ҳамманинг вазифаси.
– Қайси лавозимда бўлишдан қатъи назар, биз инсон розилиги учун ишлашимиз керак, – деди Сенат раиси. – Ҳамма ҳаракатимиз шунга қаратилган. Бугун кўтарилган масалалар муаммоларнинг айримлари, холос. Бунақа масалалар ҳар куни кўтарилмоқда. Лекин сенаторлар имконият даражасида жойлардаги ижро органлари билан бирга ҳал қилганларини бу ерда айтиб ўтирмайди. Бу ерда юқори даражада, яъни Вазирлар Маҳкамаси, вазирлик, идораларга тааллуқли бўлган масалалар кўтарилади. Халқнинг муаммолари ҳукуматга ёрдам сифатида кўтариб чиқиляпти. Албатта, буларни эътиборга олишингизни сўраймиз. Бу биргаликда ишлаб, халқнинг розилигини таъминлашимиз шарт.
Мажлис давом этмоқда.
Н.Абдураимова, ЎзА