Prezidentimizning joriy yil 24 avgustda “Chorvachilikda identifikatsiya qilish tizimi va naslchilik sohasini takomillashtirishga oid qo‘shimcha chora-tadbirlar to‘g‘risida”gi qarori qabul qilindi
Qarorga ko‘ra, O‘zbekistonda hayvonlarni identifikatsiya qilish, ro‘yxatga olish va kuzatish tizimi 2 bosqichda joriy qilinadi. Birinchi bosqichda 2023–2024 yillarda chorvachilikka ixtisoslashtirilgan 25 ta tumanda. Ushbu tumanlarda hayvonlarni identifikatsiya qilish, ro‘yxatga olish va kuzatish tizimini joriy qilish bepul amalga oshiriladi. Ikkinchisi 2025–2026 yillarda respublikaning qolgan tumanlarida joriy etiladi.
Veterinariya va chorvachilikni rivojlantirish qo‘mitasi sohada mas’ul organ hisoblanadi. Qaror bilan qo‘mita huzurida davlat muassasasi shaklida Hayvonlarni identifikatsiya qilish, ro‘yxatga olish va kuzatish markazi tashkil etiladi. Shuningdek, 25 ta tumanda chorvachilik klasterlari tashkil etiladi.
Xususan, Go‘sht va sut mahsulotlarini yetishtirish, shuningdek, aholidan yig‘ib olish, qayta ishlash va tayyor mahsulot shaklida realizatsiya qilish klasterlari tashkil etiladi. Shu bilan birga tayyor ozuqa yem mahsulotlarini ishlab chiqarish va ularni aholiga qulay bo‘lgan hududlarda sotish shoxobchalarini tashkil etish klasterlari tashkil etiladi.
Aholi xonadonlariga mahsuldor naslli mollarni yetkazib berish, chorva mollarini so‘yish kushxonalari, terilarni qabul qilish va qayta ishlash quvvatlarini ishga tushirish, terini qayta ishlovchi korxonalar bilan birgalikda kooperatsiya asosida teridan tayyor mahsulotlarni ishlab chiqarish klasterlari yo‘lga qo‘yiladi.
Shunga ko‘ra, tashkil etiladigan chorvachilik klasterlariga 60 million AQSH dollari miqdorida kreditlar ajratiladi. Paxta va g‘alla ekin maydonlarini qisqartirish hisobiga har bir tumanda kamida 100–150 gektar maydon ozuqabop ekinlar ekish uchun ajratiladi. 2023 yil 1 dekabrdan chorvachilik xo‘jaliklari o‘z ehtiyoji uchun import qilgan nasldor qoramollarga hisoblangan qo‘shilgan qiymat solig‘ini qo‘mita kafolati asosida 180 kun ichida to‘lab berish tizimi joriy etiladi. 2023 yil 1 sentyabrdan 2025 yil 31 dekabrgacha davlat tomonidan quyidagi tartibda subsidiya ajratiladi.
Chorvachilik mahsulotlari yetishtiruvchi xo‘jaliklarga xorijiy davlatlardan import qilingan nasldor qoramolning har bir boshiga 2 million so‘m, nasldor qo‘y va echkining har bir boshiga 400 ming so‘m miqdorida, parrandachilik xo‘jaliklariga har bir bosh 1 kunlik nasldor jo‘jani import qilish bilan bog‘liq xarajatlarning 15 ming so‘mini qoplash uchun subsidiya ajratiladi.
O‘zA