Самарқанд мәмлекетлик ветеринария медицинасы, шарўашылық ҳәм биотехнологиялар университетиниң Нөкис филиалында студент-қызлар арасында волейбол бойынша “Директор кубоги” жарысы болып өтти.
Филиалда билим алып атырған студент-қызлардың спортқа болған қызығыўшылығын буннан былай да арттырыў, умтылысларын қоллап-қуўатлаў, саламат турмыс тәризи қәлиплесиўине ерисиў ҳәм олардың спорт пенен турақлы шуғылланыўы ушын қолайлы шараят жаратыў мақсетинде шөлкемлестирилген жарыста волейболшы қызлар қатнасты. 15-майдан старт алған жарыстың жеңимпазларын сыйлықлаў мәресиминде филиал директоры Адилбай Есимбетов сөзге шығып, елимизде ҳаял-қызлардың саламатлығын беккемлеў, оларды спортқа тартыў бағдарында әмелге асырылып атырған илажларға тоқтап өтти.
Жарыс жуўмағында Зооинженерия бағдарының 1-курс 106-топарының командасы биринши орынды ийелеп, “Директор кубоги”ниң жеңимпазы болды. Ветеринария медицинасы бағдарының 3-курс 303-топарының командасы екинши, Ветеринария диагностикасы ҳәм лаборатория иси бағдарының 2-курс 213-топарының командасы үшинши орынларды ийеледи.
Сыйлы орын ийелерине диплом ҳәм баҳалы саўғалар тапсырылды.
Қарақалпақстан хабар агентлиги