XX әсирдеги қарақалпақ әдебиятының ең көрнекли ўәкиллери, Өзбекстан Қаҳарманлары шайыр Ибрайым Юсупов ҳәм жазыўшы Төлепберген Қайыпбергеновтың туўылған сәнелери мүнәсибети менен Республика Руўхыйлық ҳәм ағартыўшылық орайы Шымбай районлық бөлими ҳәм районлық Мәлимлеме-китапхана орайының шөлкемлестириўи менен райондағы 38-санлы улыўма орта билим бериў мектебинде оқыўшы жаслар арасында «Ибрайым Юсупов избасарлары» ҳәм «Төлепберген Қайыпбергенов шығармаларының билимданы» таңлаўының районлық басқышы шөлкемлестирилди.
Таӊлаўда оқыўшылардың И.Юсупов ҳәм Т.Қайыпбергенов шығармаларының мазмунын билиўи, шайырдың қосықларын көркемлеп оқыўы төрешилер тәрепинен баҳаланып барылды.
Таңлаў жуўмағында 1-орынды 10-санлы мектеп оқыўшысы Жупаргүл Өтеўлиева, 2-орынды 44-санлы мектеп оқыўшысы Дилназа Темирбекова, 3-орынды 13-санлы мектеп оқыўшысы Гүлзийра Қурбанбаева ийеледи.
Жеңимпаз оқыўшылар шөлкемлестириўшилер тәрепинен арнаўлы диплом, Ҳүрмет жарлықлары ҳәм әдебий китаплар топламы менен сыйлықланды.
Адилбай Оразов,
Қарақалпақстан хабар агентлиги шолыўшысы