Өзбекстан мәмлекетлик көркем өнер ҳәм мәденият институты Нөкис филиалында 1-декабрь – Қарақалпақ тилине мәмлекетлик тил бийлиги берилген күн мүнәсибети менен Өзбекстан «Миллий тикланиш» демократиялық партиясы Қарақалпақстан Республикасы Кеңеси тәрепинен «Билим-ринг» интеллектуаллық турнири шөлкемлестирилди.
Турнирде ӨзМТДП Қарақалпақстан Республикасы Кеңеси, «Юксалиш» улыўма миллий ҳәрекети Қарақалпақстан Республикасы аймақлық бөлиминиң ўәкиллери, филиал оқытыўшылары ҳәм студент-жаслары, партияның «Жаслар қанаты»ның ағзалары қатнасты.
Илажда Қарақалпақстан Республикасы Жоқарғы Кеңесиниң депутаты З.Палўанова, Өзбекстан «Миллий тикланиш» демократиялық партиясы Қарақалпақстан Республикасы Кеңеси баслығының биринши орынбасары А.Урумбаев ҳәм басқалар шығып сөйлеп, илаж қатнасыўшыларын байрам менен қызғын қутлықлады.
Партияның сайлаўалды Платформасында мәмлекетлик тилди байытыў ҳәм жетилистириў, тил мәдениятын, өз-ара қарым-қатнас қуралы сапасын раўажландырыў ўазыйпасы белгиленген. Соның менен бирге, Қарақалпақстан Республикасы Жоқарғы Кеңеси Президиумының 2020-жыл 3-ноябрьдеги «Қарақалпақ тилиниң мәмлекетлик тил сыпатындағы абырайын ҳәм орнын және де арттырыў илажлары ҳаққында»ғы қарары тийкарында Министрлер Кеңеси жанында Мәмлекетлик тилди раўажландырыў департаменти шөлкемлестирилди. Қарардың орынланыўын тәмийинлеў мақсетинде бир неше бағдардағы ўазыйпаларды өз ишине қамтыған 2021-2030-жылларда қарақалпақ тилин раўажландырыў ҳәм тил сиясатын жетилистириў концепциясы ислеп шығылды.
«Билим-ринг» интеллектуаллық турнирин шөлкемлестириўден мақсет – усы бағдардағы ўазыйпалардың орынланыўына үлес қосыў, жасларды ана тилимизге ҳүрмет руўхында тәрбиялаў, оларды ана тилимизде таза ҳәм анық сөйлеўге үйретиў, қарақалпақ тилиниң бай сөзлик дәреги менен жақыннан таныстырыў ҳәм студент-жаслардың дөретиўшилик қәбилетлерин раўажландырып барыў болып есапланады.
Турнирде республикамыздың барлық қала ҳәм районларынан келген жәми 40 қа шамалас командадан ибарат билимли жаслар ҳәм студентлер өз-ара беллести.
Турнир даўамында жаслар өзлериниң билим ҳәм қәбилетлерин ҳәр тәреплеме көрсетип, тамашагөйлердиң алғысына еристи.
Жарыс жуўмағында Карсу командасы биринши, Беркут командасы екинши, Пентагон командасы үшинши орынды ийеледи.
Турнир соңында беллесиў жеңимпазлары Өзбекстан «Миллий тикланиш» демократиялық партиясы тәрепинен таярланған I, II, III дәрежели диплом ҳәм естелик саўғалар менен сыйлықланды.
Ә.Жиемуратов,
Қарақалпақстан хабар агентлиги