Мәмлекетлик бажыхана комитети тәрепинен «Даўыт ата» шегара бажыхана посты ҳәм «Қарақалпақстан» темир жол шегара бажыхана постларындағы бос жумыс орынлары ушын талабанлар сынақтан өткерилмекте.
Комитеттиң рәсмий веб-сайтында жәрияланған дағаза бойынша арза қалдырған талабанлар, бүгин екинши басқыштағы сынақлардан өтпекте.
Комитет ҳәм басқа да аймақлық басқармалар менен онлайн видеоконференц-байланыс арқалы өткерилип атырған ушырасыўда Қарақалпақстан Республикасы бажыхана басқармасының студиясынан «Даўыт ата» шегара бажыхана посты ҳәм «Қарақалпақстан» темир жол шегара бажыхана постларына хызметке қабыл етилиўи ушын рәсмий веб-сайтта арза тапсырып, биринши басқыш – «Онлайн тест»тен табыслы өткен талабанлар қатнаспақта.
– Бүгин талабанлардың психологиялық билимлери ҳәм көнликпелери сынақтан өткерилмекте,-дейди бажыхана басқармасының жәмийетшилик ҳәм ғалаба хабар қураллары менен ислесиў топарының аға инспекторы Юлдуз Қудиярова. – Мәмлекетлик бажыхана комитети базасына интеграцияланған онлайн платформада жаратылған тест тапсырмаларының ашық-айдынлығы ҳәм жуўаплардың автомат тәризде дәрҳал жәрияланыўы бажыхана уйымларына жумысқа қабыл етиў процесслериниң толық электронластырылғанлығын анық көрсетеди.
Усы басқыштан табыслы өткен талабанлар кейинги басқышта спорт шынығыўлары арқалы сынақтан өтеди.
Қарақалпақстан хабар агентлиги