Уильям Генри Гейтс 1955-жылы 28-октябрьде Америкада туўылған. Гейтс Паул Аллен менен биргеликте ҳәзирги ўақытта дүньяның ең ири компьютер software компаниясы болған Microsoft’қа тийкар салған ҳәм бүгинги күнде оның басшысы саналады. Ол дүньяның ең бай адамлары дизиминде көп жыллар даўамында биринши орында турған.
Жеке компьютер жаратыўда бурылыс жасаған дүньяның ири ўәкиллеринен бири Гейтс монополияда айыпланып, сынға алынған. Соның менен биргеликте, Гейтс көплеген қайыр-сақаўат ислерин әмелге асырған. 2000-жылы өмирлик жолдасы менен дүзген Билл & Мелинда Гейтс Фоундатион фонды арқалы медициналық ҳәм илимий излениўлерге $36 миллиардтан аслам қаржы ажыратқан.
Гейтс 2000-жылы январь айында Microsoft атқарыўшы директоры лаўазымынан кетип, компанияны басқарыўға өтти. 2006-жылы июнь айында ол Билл & Мелинда Гейтс Фоундатион фондында ислейтуғынын жәриялады. 2008-жылдың июнь айының 27-сәнесинде Гейтс Microsoft’тағы ақырғы толық жумыс күнине шықты.
Билл Гейтс ҳаққындағы сиз еситкен ҳәм еситпеген 13 мағлыўматты келтирип өтемиз.
- Жас өспиримлик пайытларында, Lakeside Prep School мектебинде оқып жүрген гезлери Гейтс General Electric компьютеринде өзиниң дәслепки компьютер бағдарламасын жазады. Бул компьютерге қарсы ойнаў мүмкин болған «Х-0» ойыны еди.
- Жас гезинде Гейтс Дүнья Энсиклопедиясы китабын оқып шыққан.
- Америка жоқары оқыў орынларына кириў ушын тапсырылатуғын САТ имтиханында ол максимал 1600 баллдан 1590 балл топлаған.
- Басқа көплеген техно-бизнесменлер сыяқлы Гейтс те университеттеги оқыўын таслап кеткен. Ол бар ўақтын Microsoft’қа жумсаў ушын 1975-жылы Гарвард Университетинен кеткен.
- Гарвардтан кеткенинен кейин 2 жыл өтип Гейтс Нью-Мексико штатында қамаққа алынады. Ол айдаўшылық гүўалықсыз автомобиль басқарған ҳәм қызыл шырақта тоқтамай ҳәрекетленген.
- Гейтс самолётта ушыў ушын ең арзан билетлерди сатып алатуғын еди. Ҳәзирги ўақытта ол өзиниң 1997-жылы сатып алған самолётында ушады ҳәм буны «ең үлкен керексиз қәрежет» деп атайды.
- Самолёттан тысқары Гейтс 1994-жылы Codex Leicester яғный Леонардо да Винчидиң қолжазбалары коллекциясын аукционда 30.8 миллион долларға сатып алады.
- θзи миллиардер болыўына қарамастан, Гейтс перзентлериниң ҳәр бири «тек» 10 миллион доллар мийрасқа ийе болыўын айтады. «Балаларға жүдә үлкен муғдардағы пул қалдырыў оларға исленген жақсылық емес», деп пикирлейди Гейтс.
- Гейтс жылына 50 китап оқыйды екен. Оның айтыўына қарағанда «Оқыў елеге шекем менде жаңа нәрселерди үйренетуғын ҳәм өз түсинигимди сынақтан өткеретуғын усыл» дейди.
- Гейтс ҳеш қандай халықаралық тиллерди билмейди екен. Ол буны өзиниң ең үлкен кемшилиги дел санайды.
- Билл Гейтстен бай миллиардерлер дүньяда тек 10%ти қурайды.
- Биллдиң әкеси ҳуқықтаныўшы, үлкен атасы болса адвокат болған.
- Билл ҳаққында жүдә көп китаплар жазылған, егер сиз www.amazon.com сайты арқалы гатес сөзин гилт сөз ретинде терсеңиз 130 мыңнан аслам шығарма табыўыңыз мүмкин.
Бул мағлыўматлар еле сизге жетерли болмаўы мүмкин. Бирақ, биз көбирек қызықлы информацияларды сизге жеткериўге ҳәрекет еттик.
Билл Гейтс ҳаққында буннан да көбирек мағлыўматқа ийе болыўды қәлесеңиз ол ҳаққында жазылған китапларды оқың, излениң ҳәм пикирлеў дүньяңызды және де байытың.
Азизбек Дабылов,
ҚМУдың Интернет журналистикасы тәлим бағдарының 3-курс студенти.
Қарақалпақстан хабар агентлиги