Самарқанд мәмлекетлик ветеринария медицинасы, шарўашылық ҳәм биотехнологиялар университети Нөкис филиалында ата-аналар менен ушырасыў болып өтти.
Илажда Қарақалпақстан Республикасы Ветеринария ҳәм шарўашылықты раўаждандырыў комитетиниң баслығы М.Қайпанов, филиал директори А.Есимбетов шығып сөйлеп, студент-жаслардың терең билим алыўында филиал басшылары менен ата-аналардың бирге ислесиўи айрықша әҳмийетке ийе екенлигин, өз-ара пикир алысыў ҳәм усынысларды үйренип барыў унамлы нәтийже беретуғынлығын атап өтти.
Соңғы жыллары елимизде билимлендириў тараўында жедел реформалар әмелге асырылмақта. Ҳәр бир ата-ана өз перзентин үлкен үмитлер менен жоқары оқыў орынларында оқытады. Мине усындай жуўапкершилик жүгин терең сезинген филиалдың профессор-оқытыўшылары жасларды елимиздиң раўажланыўы ушын мүнәсип үлес қоса алатуғын, жетик қәнигелер болып тәрбиялаў ушын бар күш-ғайратын жумсамақта.
Ушырасыўда студент-жаслардың пәнлерди өзлестириў дәрежеси, оқыў процесслерине қатнасы, филиалдың ишки тәртип-қағыйдаларына бойсыныўы, жәмийетлик жумысларға қатнасыўы бойынша ата-аналарға мағлыўмат берилди. Өз гезегинде ата-аналардың пикир-усыныслары тыңланды. Сабақларды жақсы өзлестирип, жоқары баҳаларға оқып атырған, үлгили минез-қулқы менен өз заманласларына өрнек болып киятырған бир топар жаслардың ата-аналарына алғыснама тапсырылды.
Илаж қатнасыўшыларына филиал турмысына бағышланған видеоролик койып берилди.
Д.АБИБУЛЛАЕВ,
Қарақалпақстан хабар агентлигиниң шолыўшысы