2022- жылдыӊ 21-январында Өзбекстан Республикасы Президентиниӊ «Зәкаўат» интеллектуаллық ойынын халық арасында ғалаба-руўхый ҳәрекетке айландырыў ҳәм басқа да интеллектуаллық ойынларды раўажландырыўға байланыслы илажлар ҳаққында»ғы қарары қабыл етилген еди.
Усы қарар талапларын орынлаў мақсетинде бүгинги күни республикамыздыӊ барлық орынларында тийисли илажлар алып барылып, оқыўшы ҳәм студент- жаслар арасында «Зәкаўат» интеллектуал ойыны өткерилип келинбекте.
Талантлы жаслардыӊ логикалық пикирлерин раўажландырыў ҳәм усы арқалы билимлерин арттырыў мақсетинде өткерилип атырған усындай жарыс Нөкис районындағы «Тақыркөл» аўыл пуқаралар жыйыны аймағындағы 12-санлы улыўма орта билим бериў мектебинде болып өтти.
Беллесиўге усы жыйын аймағында жайласқан 4 мектептен 4 команда қатнасты.
Жарыс жуўмағында 18-санлы улыўма орта билим бериў мектебиниӊ «Инвент жаслары» командасы жеӊип шығып шөлкемлестириўшилер тәрепинен 1-дәрежели Диплом менен сыйлықланды ҳәм «Зәкаўат»тыӊ келеси басқышына жолламаны қолға киргизди.
-Оқыўшыларымыздыӊ билим алыўға деген ықласы айрықша,-дейди бизге 18-санлы улыўма орта билим бериў мектеби директорыныӊ орынбасары Ғумшагүл Досымбетова.-Олардыӊ ойлаў ҳәм пикирлеў шеӊбериниӊ еле де кеӊейиўинде усындай интеллектуаллық ойынлардыӊ тутқан орны айрықша. Сонлықтан бизлер мектебимизде «Зәкаўат» клубын дүзип, оны раўажландырыўға айрықша итибар қаратып келмектемиз. Усыныӊ нәтийжесинде мектебимиз оқыўшылары аймақ басқышында жеӊимпаз атанып, келеси басқышқа жолламаны қолға киргизди. Несип етсе, командамыз ағзалары районлық басқышта да жеӊимпазлықты қолға киргизетуғынлығына исенемиз.
Адилбай Оразов,
Ⱪарақалпақстан хабар агентлиги шолыӯшысы