ОНЛАЙН ӘНЖУМАН
Әжинияз атындағы Нөкис мәмлекетлик педагогикалық институтында Өзбекстан Қаҳарманы, Өзбекстан Республикасы халық жазыўшысы Саид Ахмадтың туўылғанының 100 жыллығына бағышланған Zoom бағдарламасы арқалы онлайн конференция болып өтти.
Түркияның Анкара университети менен биргеликте шөлкемлестирилген илажда жазыўшының өмири, дөретиўшилик жолы, шығармаларының талқыланыўы ҳәм үйренилиўи, шет тиллерге аўдарма етиў мәселелери сөз етилди. Нөкис мәмлекетлик педагогикалық институтының профессор-оқытыўшылары, студент-жаслары менен бир қатарда Анкара университетиниң магистрантлары менен студентлери Irem Bostan, Safiye Kirlanlaniç, Musa Can Kahraman қатнасып, жазыўшының дөретиўшилигине, илаждың әҳмийетине тоқтап өтти. Бул конферецияның Анкара университети менен биргеликте өткерилип атырғаны тосыннан емес. Себеби, Түркияда да жазыўшының шығармалары сүйип оқылады. Жақында жазыўшының таңламалы гүрриңлери “Özbek Edebiyati’nin Seçme Eserleri. Said Ahmed. Hikâyeler” деген атама менен түрк тилинде басылып шықты.
Илаж соңында Нөкис мәмлекетлик педагогикалық институты ҳәм Анкара университети арасында келешекте оқыў-методикалық, илимий-изертлеў ҳәм руўхый-ағартыўшылық тараўларында бирге ислесиўди беккемлеў бойынша келисип алынды.
Д.АБИБУЛЛАЕВ,
Қарақалпақстан хабар агентлигиниң шолыўшысы