Өзбекстан Республикасы Президенти Шавкат Миризиёев 4-февраль күни Германия, Франция, Ҳиндстан ҳәм Бирлескен Араб Әмирликлери менен еки тәреплеме бирге ислесиўди буннан былай да кеңейтиў, сондай-ақ, қабыл етилген «Жол карталары»ның орынланыўын сөзсиз тәмийинлеў мәселелерине бағышланған мәжилис өткерди.

Инвестиция экономикалық раўажланыўдың тийкарғы ҳәрекетлендириўши күши болып саналады. Сол себепли, бул мәселе мәмлекетимиз басшысының турақлы итибарында болып келмекте. 2019-жыл мәмлекетмизде «Жедел инвестициялар ҳәм социаллық раўажланыў жылы» деп жәрияланды. Бул бағдардағы жумыслардың нәтийжелилигин арттырыў мақсетинде Өзбекстан Республикасы Инвестициялар ҳәм сыртқы саўда министрлиги дүзилди.

Мәжилисте елимиз экономикасына инвестицияларды тартыў арқалы бизнести раўажландырыў, жумыс орынларын жаратыў бойынша белгили жумыслар әмелге асырылып атырғаны, бирақ булардың жеткиликли емес екенлигин атап өтти.

Инвестиция менен шуғылланыўшы кадрлар жетиспейди. Инвесторлар менен жумыс ислеў системасын жетилистириў, бар структураны раўажландырыў зәрүр. Сонын ушын, бул тараў үстинде еле көп ислеўимиз, излениўимиз керек. Сырт елден инвестиция кирмесе, мәмлекет раўажланбайды, деди Шавкат Мирзиёев.

Соңғы жылларда Өзбекстанның жетекши сырт ел мәмлекетлери менен байланыслары жедел раўажланып, жаңа мазмун менен байып бармақта. Сиясий сөйлесиўлер ҳәм делегациялар алмасыўы жеделлесип атыр.

Мәмлекетимиз басшысының сырт еллерге сапары даўамында өз-ара бирге ислесиў ҳәм шериклик мүнәсебетлерин жаңа басқышқа көтерилгени, соның ишинде, Өзбекстан менен Германия, Франция, Ҳиндстан ҳәм Бирлескен Араб Әмирликлери арасында улыўма баҳасы 14 миллиард АҚШ долларынан артық болған пайдалы шәртнама ҳәм келисимлерге қол қойылғанлығы атап өтилди.

Франция ҳәм Германия сыяқлы тек ғана Европа Аўқамы емес, ал дүнья жүзиндеги жетекши мәмлекетлер Өзбекстанның исенимли ҳәм перспективалы шериклеринен болып, сөйлесиўлер өз-ара бирге ислесиўдиң сапа жағынан жаңа басқышқа алып шығыўға хызмет етеди.

Бул мәмлекетлерден биринши гезекте, заманагөй технологиялар, инновациялар, алдыңғы тәжирийбе ҳәм басқарыў менеджментин мәмлекетимизге тартыў баслы ўазыйпа болып есапланады. Инвестициялық жойбарлар бойынша  келисимлердиң орынланыў мүддети, жуўапкер уйымлар ҳәм шахслардың «жол карталарын»да анық көрсетилген.

Мәмлекетимиз басшысы халқымыздың пәраўанлығына хызмет етиўши перспективалы жойбарларды өз ўақтында ҳәм толық орынланыў зәрүрлигин атап өтти.

Усы мақсетте Германия менен дүзилген Инвестиция ҳәм технологиялар бойынша қоспа комитетиниң исши топары «Жол картасы»ндағы жойбарлар мониторингине  ҳәм сөзсиз әмелге асырылыўына жуўап береди.

Усындай системалы жумысты басқа мәмлекетлер менен биргеликте енгизиў кереклеги атап өтилди.

Президентимиз өткен жылы октябрь айында Нью-Делиде ҳәм усы жылдың январь айында Гужаратта Ҳиндстан Бас министри Нарендра Моди менен ушырасып, бул сөйлесиўлер нәтийжесинде 3,5 миллиард долларға тең инвестициялық жойбарлар ҳәм саўда келисимлерин әмелге асырыўға келисип алған еди. Бул келисимлер мәлимлеме-коммуникация технологиялары, денсаўлықты сақлаў ҳәм фармацевтика, инновация, аўыл хожалығы, агрокластерлер, билимлендириў сыяқлы тараўларға тийисли.

Әндижанда фармацевтика тараўы бойынша биринши қоспа еркин экономикалық зона ҳәм Шарда университети, Ташкентте Технопарк ҳәм Амити университетиниң ашылыўы, заманагөй медициналық клиникалардың қурылыўы ҳәм усы сыяқлы қатар жойбарлардың орынланыўын толық тәмийинлениў зәрүрлиги атап өтилди.

Араб-мусылман дүньясында жоқары абырайға ҳәм үлкен потенциалға ийе Бирлескен Араб Әмирликлери менен еки ҳәм көп тәреплеме бирге ислесиў мәмлекетлеримиздиң имканиятларына сәйкес дәрежеге көтериў жолында избе-из қәдемлер тасланбақта. Соңғы ўақытларда бул мәмлекет пенен делегациялар алмасыўы жеделлесип, жойбарлар бойынша жедел пәтлер менен таярлық жумыслары алып барылмақта.

Мәжилисте БАӘниң қаржыландырыў имканиятлары ҳәм инвестицияларын Өзбекстанға тартыў ҳаққында да сөз етилди.

«Жол карталары»ндағы ҳәр бир жойбар сапалы ҳәм өз ўақтында орынланыўына ерисиў, машқалалы жойбарлар бойынша жаңа бирге ислесиўшилерди излеп табыўға тийкарғы итибарды қаратыў әҳмийетлилиги атап өтилди.

Мәжилисте сырт елли шериклеслер менен өз-ара пайдалы бирге ислесиўди избе-из раўажландырыўға қаратылған бундай исенимли ҳәрекетлер мәмлекетимиздиң турақлы раўажланыўы ҳәм елимиз пәраўанлығына хызмет етиўи атап өтилди.

Сырт ел инвестициялари бойынша ерисилген келисимлердиң орынланыўы бойынша жуўапкер қәнигелердиң мәлимлемеси тыңланды.

ӨзА