Өзбекстанның Черногориядағы биринши Айрықша ҳәм Толық ҳуқықлы Елшиси Ойбек Шахавдинов 25-ноябрь күни Черногория Президенти Яков Милатовичке исеним жарлықларын тапсырды. Усы тарийхый ўақыя Черногория пайтахтында, Президент резиденциясында салтанатлы мәресим шеңберинде өткерилди. Презентациядан соң еки тәреплеме қатнасықлардың перспективалы бағдарлары додаланды. Бул ҳаққында «Дүнья МА» хабар берди.
Президент Яков Милатович Өзбекстан халқын социаллық-экономикалық табыслар менен қутлықлады, тынышлық ҳәм абаданлық тиледи. Ол Президент Шавкат Мирзиёевтиң реформалар ҳәм халықаралық бирге ислесиўди раўажландырыўдағы басламаларын жоқары баҳалады. Еки мәмлекет арасындағы байланысларды жаңа сапа басқышына алып шығыў мәселеси де додалаў орайында болды.
Черногория басшысы саўда-экономикалық, инвестициялық ҳәм мәдений бирге ислесиўди беккемлеўге итибар қаратты. Ол туристлик ҳәм гуманитарлық алмасыўларды раўажландырыў ушын қолайлы шараятлар жаратыў зәрүрлигин атап өтти. Усы бағдарларда потенциалды толық иске қосыў ушын тәреплер биргеликте ислесиўге таяр екенин билдирди.
Өзбекстан ҳәм Черногория арасындағы дипломатиялық қатнасықлар 2006-жыл 19-декабрь күни орнатылған. Соңғы жыллары бул байланыслар жаңа басқышқа көтерилип, еки мәмлекет арасында түрли тараўларда бирге ислесиўди күшейтиў бойынша бир қатар басламалар алға қойылмақта.
Ойбек Шахавдинов усы жылдың март айында Өзбекстанның Венгриядағы елшиси етип тайынланған ҳәм жақында Словениядағы ҳәм Хорватиядағы елши лаўазымларын да қосып алып барған еди. Ендигиден былай ол Черногория менен еки тәреплеме байланысларды жаңа дәрежеге алып шығыўға жуўапкер болмақта.
Қарақалпақстан хабар агентлиги